Ինչքա՞ն ձայն է պետք Հրայր Թովմասանից ազատվելու համար. «Հրապարակ»
«Հրապարակ» թերթը գրում է. «Իշխանությունը Հրայր Թովմասյանին չեզոքացնելու ճանապարհին երեկ հանգեց սահմանադրական բարեփոխումների նախագիծը հանրաքվեի դնելու որոշմանը։ Սակայն եթե անգամ հաջողվի շրջանցել Սահմանադրական դատարանի համաձայնությունը, այնուամենայնիվ, Սահմանադրությունն ինքնապաշտպանության եւս մեկ մեխանիզմ է սահմանել, որը շրջանցել չի հաջողվի։
Ըստ Սահմանադրության 207-րդ հոդվածի՝ հանրաքվեի դրված ակտն ընդունվում է, եթե դրան կողմ է քվեարկել հանրաքվեի մասնակիցների կեսից ավելին, բայց ոչ պակաս, քան հանրաքվեներին մասնակցելու իրավունք ունեցող քաղաքացիների մեկ քառորդը: ՀՀ-ում, վերջին տվյալներով, քվեարկելու իրավունք ունի 2 մլն 574 հազար 916 մարդ, որի մեկ քառորդը կազմում է 643 հազար 729 ձայն։ Այսինքն, որպեսզի հանրաքվեն ավարտվի ցանկալի ելքով, իշխանություններին հարկավոր է ստանալ մոտ 650 հազար ձայն։
Համեմատության համար նշենք, որ 2018 թվականի խորհրդարանական ընտրությունների ժամանակ, երբ հեղափոխական էյֆորիան պիկի էր հասել, իշխանությունը հավաքել է 884 հազար 849 ձայն։ Բայց պետք է հաշվի առնել ոչ միայն այն, որ համապետական ընտրություններին մասնակցությունը միշտ ակտիվ է, իսկ Փաշինյանի ռեյտինգն էլ օր-օրի նվազում է, եւ դժվար է պատկերացնել, որ 650 հազար մարդ կմասնակցի հանրաքվեին եւ կողմ կքվեարկի իշխանությունների նախաձեռնած փոփոխություններին, որոնցով ոչ թե սուպերվարչապետական համակարգն է փոխվելու, այլ ընդամենը ՍԴ գործող կազմից են ուզում ազատվել»։
Ամբողջությամբ կարող եք կարդալ թերթի այսօրվա համարում:
