«Այո, ես դիտավորյալ չեմ ներկայացել դատական նիստին, բայց այդտեղ չարամտություն չկա». Միհրան Պողոսյան

Երևանի ընդհանուր իրավասության դատարանը, դատավոր Աննա Դանիբեկյանի նախագահությամբ, սանկցիա կիրառեց Յուրի Խաչատուրովի փաստաբան Միհրան Պողոսյանի նկատմամբ:

Պատճառը Ռոբերտ Քոչարյանի և մյուսների գործով նախորդ՝ հունվարի 14-ի դատական նիստում Միհրան Պողոսյանի բացակայությունն էր, որի մասին վերջինս նախապես դատարանին տեղեկացրել էր: Պողոսյանի բացակայությունը դատախազությունը համարել էր չարամտորեն դատավարական պարտականությունները չկատարելու դրսևորում ու դատարանին միջնորդել էր փաստաբանի նկատմամբ սանկցիա կիրառել:

Միհրան Պողոսյանի խոսքով, եթե դատախազությունն իսկապես հանդիսանում է օրենքի պաշտպանը, ապա հենց հունվարի 9-ի դատական նիստում (երբ, ըստ Պողոսյանի, իր ու մյուս պաշտպանների հասցեին հնչել էր  մահացած հարազատ ունենալու սպառնալիքը) պետք է կատարեր անհրաժեշտ դատավարական գործողություններ, արձանագրեր այդ փաստը ու դրան տար քրեաիրավական հետևանք:

«Մենք տեսանք դատախազության լռությունը, մենք տեսանք դատարանի լռությունը և աջակցությունը, և դա մեկ օրում տեղի ունեցած պրոցեսի հետևանք չէ: Դա ամիսներ շարունակ այս մթնոլորտը դատական նիստերի դահլիճ բերելու, դատարանի շենքի շուրջբոլորը հավաքելու վերջնարդյունքն էր: Եթե ՀՀ-ն զոհված անձանց հարազատներին դրամական փոխհատուցում չտրամադրեր գոնե այդ գործի քննության փուլում, ինչն իմ պատկերացմամբ՝ քաջալերել է նաև նման վարքագիծը, համոզված եմ, որ նման գործողություններ տեղի չէին ունենա»,- լրագրողների հետ զրույցում ասաց փաստաբան  Միհրան Պողոսյանը:

Ըստ Պողոսյանի՝ դատարանը հասկանում է, որ եղածում խնդիր կա, այլապես Էդիկ Հարությունյանից պարզաբանումներ չէր պահանջի: Բայց ըստ Պողոսյանի՝ դատարանի գործողություններն ուշացած էին:

Միհրան Պողոսյանը չի կիսում դատախազության կարծիքը, որի համաձայն՝ հունվարի 14-ի դատական նիստին փաստաբանն իր բացակայությամբ չարակամորեն չի կատարել դատավարական իր պարտականությունները:

«Այո, ես դիտավորյալ չեմ ներկայացել դատական նիստին, բայց այդտեղ չարամտություն չկա: Դրա պատճառները եղել են ոչ թե չներկայանալը, այլ ունեցել եմ իմ դրդապատճառները, առնվազն այն, որ պաշտպանությունը լրիվ ծավալով իրականացնելու հնարավորություն չունեմ»,- հավելեց Միհրան Պողոսյանը:

Պողոսյանը նաև վստահեցնում է՝ դատական նիստերը հետաձգելու կամ ձգձգելու  ոչ մի միտում չունեն, ու հորդորում է սպասել առաջիկա դատական նիստերին, որի ընթացքում, ըստ նրա, պարզ կլինի, որ քրեական հետապնդումն օրինական ոչ մի հիմք չունի:

Հաջորդ դատական նիստին մասնակցելու կամ չմասնակցելու որոշում Պողոսյանը դեռ չունի, չի վախենում, որ իրեն վարույթից կհեռացնեն, փոխարենը վստահեցնում է՝ կատարում է գործողություններ՝ լավագույնս ապահովելու Յուրի Խաչատուրովի պաշտպանության իրավունքը:

Հիշեցնենք, որ Ռոբերտ Քոչարյանի և մյուսների գործով հերթական դատական նիստը այսօր կրկին հետաձգվեց, քանի որ նիստին ներկա չէին գործով ամբաստանյալներ Ռոբերտ Քոչարյանի և Արմեն Գևորգյանի փաստաբանները, իսկ  Ռ. Քոչարյանը և Ա. Գևորգյանը դատական այս նիստում այլ փաստաբան ներգրավել չէին կարող:

Բացակա փաստաբանների նկատմամբ ևս դատախազությունը միջնորդեց սանկցիա կիրառել՝ չարակամորեն դատավարական պարտականությունները չկատարելու համար:

Մանրամասները՝ 168.am-ի տեսանյութում