«Սա մեզ համար աղետ է»․ Կլոպը՝ Աֆրիկայի գավաթի մասին
«Լիվերպուլի» գլխավոր մարզիչ Յուրգեն Կլոպը մեկնաբանել է Աֆրիկայի գավաթը ձմռանը անցկացնելու որոշումը:
2021 թվականի մրցաշարը կանցկացվի հունվար-փետրվար ամիսներին: Հատկանշական է, որ անցյալ տարի Աֆրիկայի գավաթը անցկացվեց ամռանը:
«Մենք հաստա՞տ ուզում ենք քննարկել այս հարցը: Ես չեմ կարող հարգել մրցաշարը ավելին, քան հիմա: Բայց մրցաշրջանի կեսին մրցաշարում խաղալը ակնհայտ խնդիր է: Սա աղետ է մեզ համար: Եթե մենք ասում ենք, որ խաղացողը չի կարողանա գնալ, ապա նա որակազրկվելու է:
Ինչո՞ւ որոշումը չի կայացնում ակումբը, որը վճարում է ֆուտբոլիստի աշխատավարձը: Եթե նա վնասվածք է ստացել, և մենք ասում ենք, որ նա չի կարող խաղալ ակումբի համար, մենք դեռ պետք է նրան ուղարկենք Աֆրիկա` այնտեղ նրա վիճակը ստուգելու համար:
Այդպես չպետք է լինի: Ես հիմա խոսում եմ դրա մասին, բայց ոչ ոք չի լսի: Նրանք կասեն՝ կրկին այն բողոքողն ու լացողը «Լիվերպուլից»: Սա ժամանակի վատնում է, բայց քանի դեռ ոչինչ չի փոխվում, ես կկրկնեմ: Իրավիճակը վերաբերում է խաղացողներին, ոչ թե ինձ:
ՖԻՖԱ-ն, որը պետք է միջամտի, կարծես թե չի նախատեսում մասնակցել դրան: Սա տարօրինակ իրավիճակ է: Եթե մենք ավելի քիչ հանդիպումներ ուզենք, նրանք կասեն, որ ավելի քիչ գումար կլինի: Ես կասեմ, որ համաձայն եմ դրան, այո:
Ֆուտբոլիստները խաղում են այս մրցաշարերում, նրանք դադար չեն ունենում: Ես շատ եմ ցավում Հարի Քեյնի համար։ Նա կարող է բաց թողնել Եվրոն շատ խաղերի պատճառով: Սա հեշտ չէ: Ոչ ոք չի մտածում խաղացողների բարեկեցության մասին: Խնդիրը լուծելու համար բոլոր ֆուտբոլային իշխանությունները պետք է հավաքվեն: Ոչ ոք չի խոսում այս մասին։
Սա ևս մեկ մրցաշար է, դրանք շատ-շատ են: Այլ բան է, որ դա չի օգնում աֆրիկացի խաղացողներին: Մենք դրա պատճառով չենք վաճառի Նաբիսին, Սադիոյին կամ Սալահին, բայց եթե ինչ-որ մեկին ստորագրենք, դա կազդի մեր որոշման վրա»,- ասել է Կլոպը:
Սիրարփի Աղաբաբյան
