Իրանը հրաժարվել է ԱՄՆ-ին հանձնել կործանված ինքնաթիռի սև արկղերը
«Թեհրանը մտադիր չէ ԱՄՆ-ին կամ Boeing ընկերությանը փոխանցել Ուկրաինական միջազգային ավիաուղիների՝ այսօր Իրանում կործանված ինքնաթիռի սև արկղերը»,- հայտարարել է Իրանի Քաղավիացիայի կազմակերպության ղեկավար Ալի Աբեդզադեն: Այս մասին տեղեկացնում է РИА Новости-ն:
«Այս պահին հայտնի չէ, թե որ երկիր կուղարկեն սև արկղերն ապակոդավորման նպատակով»,- նրա խոսքերն է մեջբերում Մեհր գործակալությունը:
Աբեդզադեի խոսքով՝ աղետը պետք է քննի այն պետությունը, որի տարածքում տեղի է ունեցել ողբերգությունը: Միևնույն ժամանակ՝ Ուկրաինան կարող է մասնակցել տեղի ունեցածի պատճառներն ու հանգամանքները պարզելու գործին:
Հիշեցնենք, որ Ուկրաինական միջազգային ավիաուղիների Boeing 737-800-ն այսօր վաղ առավոտյան կործանվել է Թեհրանի հարավում, անմիջապես թռիչքից հետո: Օդանավը Կիև էր ուղևորվում: Ինքնաթիռում գտնվող բոլոր 180 անձինք զոհվել են: Նախնական տվյալներով՝ օդանավը կործանվել է շարժիչի վթարի պատճառով:
Պատրաստեց 168.am-ը
