«Իսկ ինչո՞ւ վաղ թոշակի չեք ուղարկում Գլխավոր դատախազին և Հաշվեքննիչ պալատի նախագահին». Անի Սամսոնյան
Սա ընդամենը նախագիծ է, որը նպատակ ունի հեռացնել Սահմանադրական դատարանի հին անդամներին և նրանց տեղը լրացնել այս իշխանության համար նոր և վստահելի անդամներով, բայց սա չի նշանակում, որ մենք բարեփոխելու ենք համակարգը, կամ այդ ՍԴ-ն լինելու է անաչառ։ Այս մասին այսօր Ազգային ժողովում Սահմանադրական դատարանի դատավորներին վաղ կենսաթոշակի ուղարկելու մասին նախագծի քննարկման ժամանակ ասաց «Լուսավոր Հայաստան» խմբակցության պատգամավոր Անի Սամսոնյանը։
«Այս տրամաբանությամբ ժողովրդի գրպանից ձեր և ժողովրդի կողմից չսիրված դատավորներին թոշակի ուղարկելու համար փող հատկացնելը մեզ համար անընդունելի է և սրանով դուք լուծելու եք միայն քաղաքական խնդիր»,- ասաց Սամսոնյանը։
Պատգամավորի խոսքով՝ եթե դատավորները կատարել են իրավախախտումներ, ապա նրանց պետք է հեռացնել, իսկ իշխանությունը անում է հակառակը, խրախուսում է և դարձնում «էլիտար կենսաթոշակառու»՝ դեռ կենսաթոշակի տարիքը չլրացած։
«Եթե դուք ասում եք, որ այս դատավորները վնասել են մեր պետականությանը, այդ դեպքում հարց է առաջանում, իսկ ինչո՞ւ է պետությունը նրանց ձեռք մեկնում և թողնում, որ պատվով հեռանան»,- ասաց Սամսոնյանը՝ ընդգծելով, որ եթե պետությունն այս մարդկանց համարում է հին համակարգի մարդիկ, ապա հարց է առաջանում նաև, թե ինչո՞ւ նման նախագիծ չի բերվում Հաշվեքննիչ պալատի նախագահի և Գլխավոր դատախազի համար։
Սամսոնյանը նաև ընդգծեց, որ դեմ է, որպեսզի իր վճարած հարկերով այս դատավորները ստանան վաղ կենսաթոշակ։
Մանրամասները՝ տեսանյութում։
