«Ես կցանկանայի երրորդ անգամ նվաճել Չեմպիոնների լիգան, բայց այժմ մենք խոսում ենք փլեյ-օֆֆ դուրս գալու մասին»․ Մոուրինիո

«Տոտենհեմի» գլխավոր մարզիչ Ժոզե Մոուրինիոն կիսվել է իր մտքերով՝ Չեմպիոնների լիգայի խմբային փուլի «Օլիմպիակոսի» դեմ խաղից առաջ:

«Ես սիրում եմ այս մրցաշարը, ինչպես ֆուտբոլի բոլոր մարդիկ: Սա գավաթ է, որը բոլորը ցանկանում են նվաճել: Բոլորը պատիվ չեն ունեցել նվաճել այս մրցաշարը, բայց ես կարողացա դա անել երկու անգամ: Ես կցանկանայի այն երրորդ անգամ շահել, բայց հիմա դրա մասին խոսելու ժամանակը չէ: նախ պետք է անցնենք փլեյ-օֆֆ:

Սա, կարծես, իմ 148-րդ խաղն է Չեմպիոնների լիգայում: Կարծում եմ, որ խմբային փուլից հետո իմ թիմերը երբևէ դուրս չեն եկել խաղադաշտ, այն է, որ մենք խոսել ենք այս փուլի մասին և ոչ թե այն մասին, ինչ կարող էր տեղի ունենալ հետո:

Հաջորդ փուլ հասնելու համար մենք ունենք երկու հանդիպում, պետք է կենտրոնանանք դրա վրա: Պետք է հասկանանք, որ դժվար խաղ կունենանք: Մենք ոչ-ոքի խաղացինք Աթենքում, և դա ցույց է տալիս, որ թիմերի միջև մեծ տարբերություն չկա: Բայց ես հույս ունեմ, որ մենք կարող ենք հասնել այնպիսի արդյունքի, որը բավարար է փլեյ-օֆֆ դուրս գալու համար:

Ես նոր մարզադաշտում էի և զգացի կապը երկրպագուների և թիմի միջև՝ հպարտանալով այս նոր մարզադաշտում: Երկրպագուները սիրում են թիմը, ակումբը և մարզադաշտը: Եվ ես վստահ եմ, որ այս խաղը կարող է դառնալ երկրպագուների և խաղացողների ավելի խորը կապի սկիզբը: Եթե մենք հաղթենք, լավ խաղանք, գոլ խփենք, մեր ամբողջ ուժը տանք դաշտում, ցույց տանք երջանկություն և ցանկություն, ապա սա կլինի լավ պահ՝ վերադառնալու մեր հին հարաբերություններին:

Ցանկանում եմ օգնել թիմին հաղթել իմ կրքով, գիտելիքներով և փորձով: Այնուամենայնիվ, ամեն ինչ կախված է խաղացողներից, և ես հույս ունեմ, որ երկրպագուները ցույց կտան, որ իրենք մեզ հետ են: Մենք ունենք երկու տնային խաղ, որոնք մենք պետք է հաղթենք:

Այս տղաների հետ ես երբեք չեմ վախենա Չեմպիոնների լիգայում խաղալուց: Մենք պետք է ավելի հեռուն գնանք, և մենք կենտրոնացած ենք դրա վրա: Միայն այն ժամանակ, երբ թիմը հասնի քառորդ եզրափակիչ, ես կսկսեմ մտածել, որ մենք կարող ենք հաղթել մրցաշարը: Այս պահին մենք դրանից հեռու ենք և պետք է անցնենք հաջորդ փուլ:

Տվեք ինձ ժամանակ, որպեսզի ես կարողանամ բացատրել իմ գաղափարները խաղացողներին: Դրանից հետո մենք պատրաստ կլինենք գնալ ցանկացած մարզադաշտ՝ խաղալու Եվրոպայի կամ Անգլիայի որևէ բարձրակարգ ակումբի հետ, և ոչ մեկից չենք վախենա»,- ասել է Մոուրինիոն:

Սիրարփի Աղաբաբյան