«Վիրահատությունից տանում ես հարցաքննության. Դա ի՞նչ գործելաոճ է: Էս դարի գլխավոր հանցագործն Արա Բաբլոյանն ու Արսեն Բաբայա՞նն են». Գևորգ Պետրոսյան

Հասարակական և քաղաքական տարբեր շրջանակներում շարունակում են քննարկվել  «Հոկտեմբերի 27»-ի գործի հնարավոր վերաբացման մասին լուրերը և ՍԴ շուրջ ծավալվող իրադարձություններին տրված միջազգային արձագանքը:

Այսօրվա ասուլիսի ժամանակ 168.am-ի խնդրանքով այս թեմաներին անդրադարձան նաև ԱԺ նախկին պատգամավոր Վարդան Բոստանջյանը և ԱԺ պատգամավոր Գևորգ Պետրոսյանը:

Մեր հարցին, թե ինչո՞ւ է օրակարգ բերվել «Հոկտեմբերի 27»-ի գործը, և ինչպե՞ս են վերաբերվում ՍԴ-ի շուրջ ստեղծված իրավիճակի մասին Վենետիկի հանձնաժողովի նախագահ Ջիաննի Բուքիքիոյի մտահոգություններին՝ Վարդան Բոստանջյանն արձագանքեց.

«Այս պահին, իմ կարծիքով, գոյություն ունի ձեռք բերված իշխանության պահպանման գերխնդիր, որը ենթադրում է ամենազանազան հարցեր՝ ՍԴ, դատաիրավական, ինչպես նաև՝ «Հոկտեմբերի 27»: Եթե այսպես շարունակվի, հնարավոր է՝ հետադարձով հասնենք Տիգրան Մեծին:

Սա այնքան տրիվիալ է, ողորմելի, ու՝ արի ու տես, որ այսօր դա է տեղի ունենում: Այն կարող է տեղի ունենալ այնքան ժամանակ, ինչքան ժամանակ մենք կարող են համակերպվել այդ վիճակին»:

Գևորգ Պետրոսյանը, սակայն, նկատեց, որ Վարդան Բոստանջյանի նշած հետդարձը դեռևս մինչև 1997 թվականն է հասնում. «Ինձ մոտ հարց է առաջանում՝ ինչի՞ մի քանի տարի էլ հետ չեն գնում, 1996 թվական ինչի՞ չեն գնում. եթե չեմ սխալվում, 1996 թվականին հենց իշխանությունը պահելու հետ կապված շատ ավելի նշանավոր իրադարձություններ տեղի ունեցան:

Եթե իսկապես ուզում եք այս երկրում արդարության մթնոլորտը հաստատվի, մի քիչ էլ հետ գնացեք. Կանգնել են 97-ի վրա ու հետ չեն գնում»:

Անդրադառնալով Վենետիկի հանձնաժողովի նախագահ Ջ. Բուքիքիոյի  հայտարարությանը՝ նա նշեց. «Ակնհայտ է, որ իրենք էլ են քաղաքական ենթատեքստ տեսնում: Իրավունքից գալիս ենք քաղաքականության դաշտ: Ես հավաստիության կանխավարկածով վերաբերվելով մեր իշխանության և մեր իրավապահ մարմինների գործողություններին և որոշումներին, երբեք չեմ ասել, որ սա բացառապես քաղաքական գործընթաց է` թեպետ հոգու խորքում նման կասկած ունեցել եմ, հիմա գնալով կասկածները խորանում են:

Վիրահատությունից տանում ես հարցաքննության. Դա ի՞նչ գործելաոճ է: Էս դարի գլխավոր հանցագործը Արա Բաբլոյանն ու Արսեն Բաբայա՞նն են»:

Առհասարակ, ՍԴ-ի հարցում ԱԺ պատգամավորը մեկ խնդիր է տեսնում. «Ասում են` ՍԴ-ում ճգնաժամ է. այնտեղ մի ճգնաժամ կա՝ էդ ճգնաժամի անուն-ազգանունը Վահե Գրիգորյան է, որը բացարձակապես չի մասնակցում ՍԴ աշխատանքներին, բայց ինքնագոհ կերպով ծառերի տակ ինչ-որ հարցազրույց է տալիս ու ասում՝ նման մարմին չկա:

Ա՛յ ընկեր ջան, եթե նման մարմին չկա, ՍԴ գոյություն չունի, դու ինչի՞ համար ես պայքարում, չգործող կառույցի նախագա՞հ ես ուզում դառնալ»:

Ի դեպ, Գ. Պետրոսյանը նշեց, որ ինքն անձամբ մտադրություն ունի հետ կանչելու Վահե Գրիգորյանին, և չի բացառվում, որ նման նախաձեռնությամբ հանդես գա. «Էս երկրում պիտի ոչ մի անբան պաշտոնյա ընդհանրապես պաշտոնի չլինի և եղած դեպքում էլ՝ աշխատավարձ չստանա, անգամ 4 անգամ խրախուսում ես ստանում, ինչի՞ համար, ընկեր ջան:  Բա ո՞ւր ա էդ Պետական վերահսկողական ծառայությունը:

Էս երկրում մինչև երկակի ստանդարտների ռեժիմից դուրս չգանք, ոչ մի ներդրում չի  արվելու, սոցիալական խնդիրները մնալու են չլուծված, և այդպես շարունակ»:

Զարուհի Դիլանյան