Երևանում Հասան Ռուհանին հանդես եկավ ԵԱՏՄ-Իրան համագործակցության վերաբերյալ առաջարկով
«Լիահույս ենք, որ Իրանն օգուտներ կստանա այս համագործակցությունից»,- քիչ առաջ այս մասին Եվրասիական տնտեսական բարձրագույն խորհրդի ընդլայնված կազմով նիստի ընթացքում ասաց հատուկ հյուր ԻԻՀ նախագահ Հասան Ռուհանին՝ անդրադառնալով նիստի արդյունքներին և Իրան-ԵԱՏՄ համագործակցությանն ու համաձայնագրին, որն ուժի մեջ կմտնի հոկտեմբերի վերջին:
Ռուհանին իր խոսքի առաջին ծավալուն հատվածը նվիրեց աշխարհաքաղաքական հարաբերություններին, Միացյալ Նահանգների հետ առճակատմանը, ԱՄՆ-ի, նրա խոսքով, անմարդկային պատժամիջոցներին Իրանի դեմ:
Անդրադառնալով կոնկրետ ԵԱՏՄ-Իրան համագործակցությանը՝ Ռուհանին ասաց, որ ողջունում է ԵԱՏՄ անդամ երկրների և ԵԱՏՄ-ի հետ ցանկացած համագործակցություն ֆինանսական, բանկային գործի և ներդրումների ոլորտում, ողջունում է համագործակցության նոր և արդյունավետ մեխանիզմների փնտրտուքը:
ԻԻՀ ղեկավարն առաջարկեց ստեղծել հատուկ աշխատանքային խումբ ԻԻՀ և ԵԱՏՄ անդամ երկրների ներկայացուցիչների մասնակցությամբ՝ ուսումնասիրելու և իրականացնելու համար համատեղ ներդրումային պրոյեկտներ:
Նա նշեց, որ հույս ունի՝ ԻԻՀ-ն կստանա օգուտներ այս համագործակցությունից, կլինեն լավ տնտեսական հարաբերություններ ԵԱՏՄ անդամ երկրների հետ քաղաքական հարաբերություններին համահունչ:
