ՀԴՄ սարք չունենալու պատճառով տուգանքների գումարները ետ ստանալու համար տնտեսվարողներն իրավունք ունեն դիմել ՊԵԿ բողոքարկման հանձնաժողով
«Դժվար է ասել, թե ՀԴՄ-ների հետ կապված խնդիրը լուծվել է, ուղղակի հայտարարվեց, որ չեն տուգանելու, մինչև այդ ընկերությունները կներկրեն ՀԴՄ սարքեր և վստահ կլինեն, որ հասանելիությունը կա։ Բիզնեսի տեսանկյունից լավ լուծում է, պետության տեսանկյունից լավ լուծում չի, որովհետև շրջանառությունը կարող է չհայտարագրվել։ Դա անուղղակի է ստացվում, բայց եթե ՀԴՄ չեն հայտարարագրում, հանգիստ կշարունակեն իրենց գործունեությունը, և ոչ ոք ոչինչ չի ասի»,- 168.am-ի հետ զրույցում հայտարարեց տնտեսագետ Գևորգ Պողոսյանը՝ անդրադառնալով ՊԵԿ-ի հետ ձեռք բերված համաձայնությանը, որ ՊԵԿ-ը կդադարեցնի նոր սերնդի ՀԴՄ սարքի համար դիմած տնտեսվարողներին տուգանելը, թեև կշարունակի վերահսկել։ Սակայն նոր բացվող բիզնեսները պետք է անպայման նոր սերնդի ՀԴՄ սարք ստանալու հայտ ներկայացնեն։
Ըստ նրա՝ այժմ խնդիր է առաջանում, որ տնտեսվարողները կփորձեն չհայտարարագրել եկամուտները և վճարել հարկերը։
Հին սերնդի ՀԴՄ-ները, տնտեսագետի խոսքով, օրենքով սահմանված պայմաններին չեն բավարարում, առնվազն բանկային քարտով վճարում ընդունելու հնարավորություն չունեն։
Գ. Պողոսյանը նշեց, որ նոր սերնդի ՀԴՄ սարքեր կարելի է գնել երկրորդային շուկայից, բայց այդտեղ գները շատ տարբեր են՝ 200-300 հազար դրամ։ Նոր ՀԴՄ սարքերը հանրապետություն կներկրվեն, ըստ ամենայնի, սեպտեմբերին։
«Այս ընթացքում տուգանված տնտեսվարողները, հատկապես՝ ՊԵԿ-ի այս հայտարարությունից հետո, իրավունք ունեն գնալ և հետ պահանջել իրենց գումարը, որովհետև դա չի կարող արդարացի դիտվել, որ տուգանվում է՝ պետության կողմից ՀԴՄ սարք չմատակարարելու պատճառով»,- ասաց տնտեսագետը։
ՊԵԿ-ից 168.am-ին փոխանցեցին, որ տուգանքների գումարները ետ ստանալու համար տնտեսվարողներն իրավունք ունեն դիմել բողոքարկման հանձնաժողով, հարցը կքննարկվի և, հնարավոր է, գումարը վերադարձվի։
