«Բոլորին էլ կարելի է երգ նվիրել». Արայիկ Հարությունյանը՝ Ռազմիկ Ամյանի երգի մասին
«Որևէ մեկի կոչման վերանայման հարց չի եղել, իմ գրառումը եթե տեսել եք, ապա այնտեղ խոսել եմ առահասարակ կոչումների շնորհման կարգի մասին։ Ես չեմ ասել որևէ մեկի կոչումը վերանայելու մասին»,- այս մասին այսօր լրագրողների հետ զրույցում ասաց ՀՀ կրթության, գիտության, մշակույթի և սպորտի նախարար Արայիկ Հարությունյանը՝ անդրադառնալով իր ֆեյսբուքյան գրառմանը։
Հիշեցնենք, որ նախարարն իր ֆեյսբուքյան էջում գրել էր, որ կոչումների շնորհման հարցը լրջագույն քննարկման կարիք ունի: «Հ.Գ. մինչդեռ նա մշակույթի վաստակավոր գործիչ է»,- գրել էր նախարարը։
Նա այս գրառումը կատարել էր այն բանից հետո, երբ համացանցում հայտնվել էր երգիչ Ռազմիկ Ամյանի երգը՝ նվիրված ՀՀ երրորդ նախագահ Սերժ Սարգսյանի ծննդյան օրվան։
Լրագրողի հարցին՝ օրինակ՝ կարելի՞ է երգ նվիրել Սերժ Սարգսյանին, Արայիկ Հարությունյանը պատասխանեց, որ բոլորին էլ կարելի է երգ նվիրել։
Հաջորդ հարցին՝ ո՞րն էր գրառման առիթը, Արայիկ Հարությունյանը պատասխանեց. «Կարծում եմ՝ ստատուսում ամեն ինչ ասված է»։
Զվարթ Խաչատրյան
