«Սա թուլության նշա՞ն է։ Ո՛չ, հենց վստահության նշանն է». Զոհրաբ Մնացականյան
«Մենք մնում ենք հավատարիմ մեր պայմանավորվածություններին, ամեն ինչ անելու ենք, որ դա իրականություն դառնա, հիմա այդ առումով աշխատում ենք»,- այսօր ԱԺ-ում լրագրողների հետ զրույցում հայտարարեց ԱԳ նախարար Զոհրաբ Մնացականյանը՝ խոսելով զինադադարի մասին պայմանավորվածությունների մասին։
Նա ցավ արտահայտեց օրերս ադրբեջանական կրակոցից հայ զինծառայող Սիփան Մելքոնյանի մահվան կապակցությամբ։
«Ինչ վերաբերում է զինադադարի պահպանման պայմանավորվածությանը, մենք շարունակելու ենք պայմանավորվածությանը հետևել, ամրապնդել և պնդել, որ այդ համաձայնությունները պիտի պահպանվեն և ամրապնդվեն։ Սա թուլության նշա՞ն է։ Ո՛չ, հենց վստահության նշանն է, որ անհրաժեշտ է։ Եթե մենք գնանք ավելի խիստ իրավիճակի, դրա վատթարացման ուղղությամբ, դրա հետևանքները լինելու են շատ-շատ ծանր, անդրադարձ է լինելու բոլոր առումներով»,- ասաց Մնացականյանը։
