«Մեկ Հայաստան» ցենտրիստական կուսակցությունը հիմնադիր համագումար անցկացրեց. Tert.am
Ինչպես գրում է Tert.am-ը, «Մեկ Հայաստան» ցենտրիստական կուսակցությունն այսօր հիմնադիր համագումար անցկացրեց: Համագումարին մասնակցում էին «Բարգավաճ Հայաստան» խմբակցության պատգամավորներ Գևորգ Պետրոսյանը, Արման Աբովյանը, ՀՀԿ-ական նախկին պատգամավոր Արմեն Աշոտյանը և այլ հրավիրվածներ:
Կուսակցության հիմնադիրներից քաղաքագետ Արթուր Ղազինյանը նշեց, որ կուսակցության ստեղծման նպատակն է խթանել Հայաստանում ժողովրդավարական քաղաքական համակարգի կայացումը և նպաստել քաղաքացիական նոր մշակույթի և պետականամետ մտածողության արմատավորմանը:
«Հայաստանի 3-րդ Հանրապետությունը ապրում է իր պատմության ամենակարևոր և վճռորոշ շրջանը, քանզի մեր հայրենիքում տեղի են ունեցել և շարունակում են ընթանալ այնպիսի իրադարձություններ, որոնք ի զորու են փոխել մեր պետության ընթացքը: Կարող ենք շարժվել մի ուղղությամբ և ունենալ ուժեղ պետություն, պետականություն, պետական և ազգային ինստիտուտներ, ամրացնել և կենսունակություն հաղորդել ազգային ինքնության հիմքերին կամ կարող ենք շարժվել մեկ այլ ուղղությամբ և, վերջին հաշվով, հասկանալ՝ ՀՀ-ն որպես ինքնիշխան, իրավական, ժողովրդավարական սոցիալական պետություն, արդյոք կկարողանա՞ դիմագրավել մարտահրավերներին: Մարտահրավերները ընթանում են ինչպես ներսում, այնպես էլ դրսում: Հայաստանի շուրջ ընթանում են ռեգիոնալ և աշխարհաքաղաքական բավականին բարդ գործընթացներ»,-նշեց նա:
Արթուր Ղազինյանը շեշտեց, որ նախորդ իշխանություններին կարելի է անվերջ քննադատել, մեղադրել բոլոր դժվարություններում և դրա վրա ձևավորել, հասունացնել քաղաքական կապիտալ, սակայն պետք է ընդունել, որ այդ քաղաքական կապիտալը նմանվում է ավազի, որն անընդհատ հոսում է:
Մանրամասները՝ սկզբնաղբյուր կայքում:
