«ԱրՄաթը» Մերձավոր Արևելքի երկրներ արտահանելու առաջարկ է ստացել

Ինչպես արդեն տեղեկացրել ենք, Առաջատար տեխնոլոգիաների ձեռնարկությունների միությունը (ԱՏՁՄ) «ԱրՄաթ» ինժեներական լաբորատորիաների ծրագիրն օրերս ներկայացրել է Աբու Դաբիում տեղի ունեցած «Bett Middle East Leadership Summit & Expo» բրիտանական գիտաժողով-ցուցահանդեսին:

«Արմաթ» ծրագրի մեթոդաբանության և տեխնիկական գծով պատասխանատու Ավագ Սայանը նշում է, որ «ԱրՄաթը», առաջ անցնելով տասնյակ երկրներից,   «Bett MEA Awards 2019»-ի «Նորարարության» անվանակարգի  մրցույթի եզրափակիչ փուլ էր անցել Հորդանանի, Եգիպտոսի և ԱՄԷ-ի կրթական ծրագրերի հետ: «ԱրՄաթ» ցանցի մոդելը մեծ հետաքրքրություն է առաջացրել ցուցահանդեսի և՛մասնակիցների, և՛ այցելուների շրջանում:

«Մեր ուսումնական ծրագրի բովանդակությունն ու աշակերտների ստեղծած պրոդուկտները դրա վառ ապացույցն էին: Այն, որ «ԱրՄաթը» արտաժամյա է և ուսումնական ծրագրի պարտադիր մաս չի կազմում, հանգեցնում է նրան, որ դպրոցականներն անկաշկանդ ու առավել ստեղծագործ են  ինժեներության հիմունքների յուրացման պրոցեսում»,- նշում է Ավագ Սայանը:

Ավագ Սայանի խոսքով, առաջարկներ են ստացել «ԱրՄաթը» Մերձավոր Արևելքի երկրներ արտահանելու վերաբերյալ,  և այժմ այդ ուղղությամբ բանակցություններ են ընթանում:

«ԱրՄաթի» մրցակցային առավելությունը նաև ճարտարագիտական կոմպլեքս գիտելիքներն են.  ցուցահանդեսին «ԱրՄաթն» այն եզակի ծրագիրն էր, որ դպրոցականներին միաժամանակ սովորեցնում է մոդելավորում, ծրագրավորում և ինժեներություն»,- ԱՏՁՄ-ի փոխանցմամբ՝  նշում է «ԱրՄաթ» ծրագրի մարզային համակարգող Սոֆյա Հարությունյանը:

Աբու Դաբիում ապրիլի 22-ին և 23-ին «Bett Middle East Leadership Summit & Expo»-ին մասնակցել են պետական և կրթական շուրջ 50 կազմակերպություն, 20-ից ավելի երկրների պետական կառույցների և կրթության նախարարությունների պաշտոնյաներ և այլ ներկայացուցիչներ: Ցուցահանդեսին «ԱրՄաթի» մասնակցությանն աջակցել է ԱՄԷ-ում ՀՀ դեսպանությունը:

Նշենք, որ «ԱրՄաթ» ինժեներական կրթության անվճար ծրագիրը նախաձեռնել և իրականացնում է ԱՏՁՄ-ն՝ ՀՀ Կառավարության և դոնոր կազմակերպությունների աջակցությամբ: «ԱրՄաթ» ցանցն այժմ ընդգրկում է Հայաստանի, Արցախի, Ախալքալաքի շուրջ 270 դպրոց: ԱՏՁՄ-ն բանակցություններ է վարում «ԱրՄաթ» հայկական կրթական մոդելը մի շարք երկրներ արտահանելու համար:

«ԱրՄաթը» միջազգային ասպարեզում հաղթանակներ է տարել  Բրազիլիայում կայացած ՏՏ համաշխարհային համաժողովի «WITSA Global Excellence Award» մրցանակաբաշխության «Կայուն զարգացման», Թբիլիսիում կայացած «GITI-2016» մրցանակաբաշխության «ՏՏ կրթության լավագույն մատակարար» անվանակարգերում, Եվրասիական թվային պլատֆորմներ ամենամյա միջազգային մրցույթում արժանացել է Nokia ընկերության մրցանակին:

Սիրարփի Աղաբաբյան