Գլխավոր դատախազը՝ Դավիթ Սանասարյանին որպես կասկածյալ ներգրավվելու լուրերի մասին

ՀՀ գլխավոր դատախազ Արթուր Դավթյանը խոստանում է անհրաժեշտ պահին համապարփակ տեղեկություն տրամադրել Պետական վերահսկողական ծառայության մի քանի աշխատակիցների քրեական գործի վերաբերյալ և առայժմ չի մեկնաբանում լուրերն այն մասին, որ քրգործում ծառայության պետ Դավիթ Սանասարյանը ներգրավվել է որպես կասկածյալ:

Հարցին, թե արդյոք ճի՞շտ են լուրերը, որ ՊՎԾ պետ Դավիթ Սանասարյանը որպես կասկածյալ ներգրավված է գործում՝ դատախազն ասաց. «Թույլ տվեք այս պահին հարցին ուղիղ պատասխան չտալ՝ խոստանալով առաջիկայում ավելի մանրամասն տեղեկություն տրամադրել: Այս պահին ավելին չեմ կարող ասել: Նախաքննության շահն է դա պահանջում»:

Դավթյանը նշեց՝ հասկանալով հանրային հնչեղությունը՝ անհրաժեշտ պահին համապարփակ տեղեկություն կտրամադրեն:

Հիշեցնենք, որ լրատվամիջոցներում լուրեր են շրջանառվում, թե Դավիթ Սանասարյանը ՊՎԾ աշխատակիցների քրեական գործով որպես կասկածյալ է ներգրավվել:

ՀՀ ԱԱԾ քննչական դեպարտամենտում քննվող գործի շրջանակներում 2019 թվականի փետրվարի 25-ին ՀՀ պետական վերահսկողության ծառայության 2 պաշտոնատար անձինք՝ Սամվել Ադյանը և Գևորգ Խաչատրյանը և նրանց կողմից հովանավորվող տնտեսավարող սուբյեկտի ներկայացուցիչ Տ.Ա-ն ձերբակալվել են: 2019 թվականի փետրվարի 27-ին հիշյալ պաշտոնատար անձանց մեղադրանք է առաջադրվել ՀՀ քրեական օրենսգրքի 308-րդ հոդվածի (Պաշտոնեական լիազորությունները չարաշահելը) 2-րդ մասով և 325-րդ հոդվածի (Փաստաթղթեր, դրոշմներ, կնիքներ, ձևաթղթեր, տրանսպորտային միջոցների պետհամարանիշներ կեղծելը, իրացնելը կամ օգտագործելը) 2-րդ մասով, իսկ նրանց կողմից հովանավորվող տնտեսավարող սուբյեկտի ներկայացուցչին՝ ՀՀ քրեական օրենսգրքի 38-308-րդ հոդվածի 2-րդ մասով և 325-րդ հոդվածի 2-րդ մասով։ Դատարանի կողմից որպես խափանման միջոց նշված երեք անձանց նկատմամբ ընտրվել է կալանավորումը։