««Մանչեսթեր Յունայթեդի» խաղի շուրջ դրական մթնոլորտ է ստեղծվել». Ռայան Գիգզ
«Մանչեսթեր Յունայթեդի» նախկին կիսապաշտպան Ռայան Գիգզը, ով տվյալ պահին գլխավորում է Ուելսի ազգային հավաքականը, կիսվել է ԱՊԼ-ի շրջանակներում «Հադերսֆիլդի» նկատմամբ մանկունյանցիների տարած տնային հաղթանակից (3:1) ստացած տպավորություններով:
Ուլե-Գունար Սուլշերի համար սա երկրորդ անընդմեջ հաջողությունն էր «Մանչեսթեր Յունայթեդի» գլխավոր մարզչի պաշտոնում նշանակվելուց հետո:
«Սա Ուլեի առաջին տնային խաղն էր, և բոլորը դրական տրամադրված էին սպասում դրան Քարդիֆում կայացած խաղից հետո, որտեղ թիմը լավ խաղ և արդյունք ցուցադրեց: Ես կարծում եմ, որ բոլորն անհամբերությամբ սպասում էին խաղին: Մեծ ֆուտբոլիստները սկսել են ցուցադրել իրենց. Պոգբան խփում է, դե Խեան մի քանի սեյվեր կատարեց, Մարկուս Ռեշֆորդը յուրաքանչյուր խաղից հետո ավելի ու ավելի լավն է դառնում: Խաղի շուրջ իրական դրական մթնոլորտ կա»,- Գիգզի խոսքերն է մեջբերում Manchester Evening News-ը:
Պատրաստեց Անի Գաբուզյանը
