ՊԲ-ում անց են կացվել մարտավարաշարային պարապմունքներ
Պաշտպանության բանակում ուսումնական փուլի մեկնարկի հանդիսավոր միջոցառումներից անմիջապես հետո ստորաբաժանումներն անցել են մարտական պատրաստականության մարտավարաշարային պարապմունքների կատարմանը:
Ջոկ, դասակ, վաշտ և գումարտակ օղակներում ըստ հերթականության ստորաբաժանումները բերվել են մարտական պարաստականության բարձր աստիճանների: Հրամանատարական կազմը դետալ առ դետալ վերահսկել է անձնակազմի գործողությունները և նկատված թերությունները վերացրել տեղում, արդյունքում` բոլոր զինծառայողները գործողությունները կատարել են ներդաշնակ, հստակ և պահանջված մակարդակով:
Նոր ուսումնական փուլին զինծառայողները պատրաստվել էին նախապես և, չհաշված նկատված փոքրիկ թերացումներն ու բացթողումները, նրանք իրենց գործողությունները կատարում էին հստակորեն` քաջ գիտակցելով, որ հարաբերական անդորրը ստիպում է լինել առավելագույնս զգոն ու պատրաստ: Այդ իսկ գիտակցումով տղաները վճռականորեն սահմանված հերթականությամբ կատարում էին մարտավարաշարային պարապմունքների բոլոր փուլերը:
Ուսումնական բոլոր գործընթացներին զուգահեռ մասնավորապես կարևորվում է նաև ստորաբաժանումների գործողություններին նոր համալրած անձնակազմի ներդաշնակման հարցը: Վաշտի հրամանատար, կապիտան Մեսրոպ Վարդանյանի համոզմամբ` նորեկները շարքերը համալրել են անհրաժեշտ պատրաստվածությամբ և մնում է պարզապես ուղղորդել նրանց` անհատական իմացությունները կոլեկտիվում առավել արդյունավետ օգտագործելու առումով:
Ուսումնական փուլի մեկնարկային միջոցառումների ավարտին Պաշտպանության բանակի բոլոր զորամասերը բերվել են մարտական պատրաստականության բարձր աստիճանների, ինչի արդյունքում արձանագրվել է, որ Պաշտպանության բանակը մարտունակ է և պատրաստ՝ իրավիճակի ցանկացած զարգացման պայմաններում արագ և օպերատիվ հակազդելու հակառակորդի հավանական գործողություններին:
Հարություն Մկրտչյան
