Օգոստոսի 27-ից սեպտեմբերի 1-ը հանրապետության ողջ տարածքում կդիտվի առանց տեղումների եղանակ
Օգոստոսի 27-ին ՀՀ արտակարգ իրավիճակների նախարարությունում կայացավ հերթական ամենշաբաթյա խորհրդակցությունը, որը վարեց նախարար Հրաչյա Ռոստոմյանը:
Փրկարար ծառայության տնօրեն, փ/ծ գնդապետ Արտակ Նահապետյանը զեկուցեց անցած շաբաթվա ընթացքում կատարված հանձնարարականների և ընթացիկ աշխատանքների մասին: Տնօրենը նշեց, որ հաշվետու ժամանակահատվածում «911» ծառայություն ստացվել է 26598 զանգ, գրանցվել է 201 հրդեհ, որից 129-ը՝ բուսածածկ տարածքներում, այրվել է 576 հա տարածք: Գնդապետ Նահապետյանն անդրադարձավ նաև անցկացված ուսումնական վարժանքներին և մարտական պատրաստության դասընթացներին:
Հիդրոօդերևութաբանության և մթնոլորտային երևույթների վրա ակտիվ ներգործության ծառայության տնօրեն Ս. Հովսեփյանը զեկուցեց ջրամբարների լցվածության և առաջիկայում սպասվող եղանակի մասին: Օգոստոսի 27-ից սեպտեմբերի 1-ը հանրապետության ողջ տարածքում կդիտվի առանց տեղումների եղանակ, իսկ հյուսիսային հատվածների առանձին շրջաններում կգրանցվեն տեղումներ: Ամսվա ավարտին ջերմաստիճանն աստիճանաբար կնվազի 3-4 աստիճանով:
Ամփոփելով խորհրդակցությունը՝ նախարարը մի շարք հանձնարարականներ տվեց ստորաբաժանումների ղեկավարներին, որոնք վերաբերում էին աշխատանքի արդյունավետ կազմակերպմանը, առաջիկայում սպասվող միջոցառումների պատշաճ կազմակերպմանը:
