Սեբաստյան Կուրցը բացատրել է Ավստրիայից ռուս դիվանագետներին արտաքսելու մերժումը
Վիեննան հրաժարվել է արտաքսել ռուս դիվանագետներին, որովհետեւ ավանդաբար լավ հարաբերություններ է պահպանում Ռուսաստանի հետ: Այս մասին, ինչպես հաղորդել է ՌԻԱ Նովոստին, Plus 4 հեռուստաալիքի եթերում հայտարարել է Ավստրիայի կանցլեր Սեբաստյան Կուրցը:
«Եվրամիության երկրների մեկ երրորդը չարտաքսեց ռուս դիվանագետներին, եւ մենք նրանց թվում ենք: Ես արտաքին գործերի նախարարի հետ որոշում ընդունեցի չանել դա, որոհվետեւ մենք ավանդաբար լավ հարաբերություններ ենք պահպանում Ռուսաստանի հետ, չեզոք երկիր ենք եւ կենտրոնակայան ենք հանդիսանում միջազգային բազմաթիվ կազմակերպությունների համար, ինչպիսիք են ՄԱԿ-ը կամ ԵԱՀԿ-ն»,- ասել է քաղաքական գործիչը:
Կուրցը հիշեցրել է, որ Ավստրիան՝ որպես Եվրամիության անդամ, հանրակցության անդամ մյուս երկրների հետ պաշտպանել է կոնսուլտացիաների համար Մոսկվայից ԵՄ-ի դեսպանի հետկանչումը Բրյուսել:
