«Եթե որևէ մեկին հիասթափության առիթ եմ տվել, ուզում եմ պաշտոնապես ներողություն խնդրել». Նիկոլ Փաշինյան
«Ես պատրաստված եկել էի, մտածում էի՝ կվիճարկեն, կասեն՝ էդ ի՞նչ թիվ եք ասում, ի՞նչ 21.9 տոկոս գնաճ, բայց ոչ ոք չվիճարկեց»,- ԱԺ-ում լրագրողների հետ զրույցում ասաց «Ելք» խմբակցության ղեկավար Նիկոլ Փաշինյանը:
Հարցին՝ թանկացումների թեման փակվա՞ծ է ձեզ համար, Ն. Փաշինյանն այսպես պատասխանեց. «Թանկացումների թեման ինչպե՞ս կարող է փակվել: Եթե դա հնարավոր լիներ փակել քաղաքացիների համար, մեզ համար էլ փակված կլիներ, բայց քանի որ քաղաքացիների համար բաց է, մեզ համար էլ չի կարող փակված լինել: Առաջիկայի հետ կապված շատ հարցեր կան, որ պետք է որոշենք, մենք կքննարկենք, կորոշենք»:
Դիտարկմանը, թե հիմա եթե գնահատականներ հնչեն, որ դուք էլ քաղաքացիներին զբոսանքի հանեցիք, արդարացի չե՞ն լինի՝ Ն. Փաշինյանն այսպես պատասխանեց. «Ցանկացած քաղաքացի ազատ է հնչեցնել ցանկացած գնահատական: Կոնկրետ այդ գնահատականների հետ կապված՝ ես ասել եմ, որ մենք ունենք շատ հստակ ձևակերպված նպատակ և հանգրվաններ: Վերջին երկու գումարման Ազգային ժողովի պատմության մեջ սա առաջին դեպքն է, որ ընդդիմությունն արտահերթ նիստ է հրավիրել, և այդ նիստը կայացել է: Դա զբոսանքի և ոչ զբոսանքի ամպլիտուդն է»:
Հարցին՝ այն մի քանի հարյուր քաղաքացին, որոնք մասնակցեցին ձեր երթերին, արդյոք ձեզնից հիասթափվելու պատճառներ չունե՞ն, Ն. Փաշինյանը պատասխանեց, որ մարդիկ բոլորից հիասթափվելու լեգիտիմ իրավունք ունեն, եթե դրա համար ունեն առիթներ: Լրագրողի ճշտող հարցին՝ ըստ Ձեզ՝ ձեզնից ունե՞ն հիասթափվելու առիթ, Ն. Փաշինյանը պատասխանեց, որ չունեն. «Ճաշակի հարց է: Իսկ ընդհանրապես չեմ բացառում, որ մենք քաղաքական գործունեության ընթացքում սխալներ արել ենք, չեմ բացառում, որ անում ենք, չեմ կարող բացառել, որ կանենք, որովհետև մարդը սխալական է: Եթե որևէ մեկին հիասթափության առիթ եմ տվել, ուզում եմ պաշտոնապես ներողություն խնդրել ու ասել, որ ամեն ինչ կանեմ, որ առաջիկայում ուղղվեմ, ինչքան հնարավոր է, արագ»:
