«Սա նոր քայլ է էներգետիկ քաղաքականության ոլորտում». Միքայել Մելքումյանը՝ էներգետիկ շուկայի ազատականացման մասին
Ինչպես հայտնի է, այսօր Ազգային ժողովում քննարկվում է «Էներգետիկայի մասին» Հայաստանի Հանրապետության օրենքում փոփոխություններ և լրացումներ կատարելու մասին օրենքի նախագիծը, որով առաջարկվում է ազատականացնել էներգետիկ շուկան:
«Առաջարկվող օրենքի նախագիծը նոր քայլ է էներգետիկ քաղաքականության ոլորտում»,- հայտարարեց «Ծառուկյան» խմբակցության պատգամավոր, ԱԺ փոխնախագահ Միքայել Մելքումյանը:
Մ. Մելքումյանի խոսքով՝ այն բոլոր տնտեսագիտական պնդումները, որ մոնոպսիոն շուկան գրեթե բնական մենաշնորհի պես մի բան է, այստեղ հետաքրքիր տրանսֆորմացիայի է ենթարկվում. «Շուկան կարգավորվողից բացի՝ լինելու է նաև մասամբ չկարգավորվող: Այսինքն՝ հիբրիդային մի կառուցվածք ենք ստանում, որը ես ողջունում եմ: Ամեն ինչ պետք է լինի, որ ազատ շուկայական հարաբերություններ կայանան»:
Մ. Մելքումյանը նկատեց, որ, իհարկե, ազատ շուկաները ռիսկեր են պարունակում, բայց պետությունը պետք է կարողանա ուղղորդել:
