ԵԱՏՄ անդամ բոլոր երկրներում ավարտվել է Մաքսային օրենսգրքի վավերացման գործընթացը
Եվրասիական տնտեսական միության անդամ բոլոր 5 երկրներում ավարտվել է միության Մաքսային օրենսգրքի վավերացման գործընթացը: Ինչպես հայտնեցին Եվրասիական տնտեսական հանձնաժողովի մամուլի գրասենյակից, Մաքսային օրենսգրքի մասին պայմանագիրը ստորագրել է նաև Ղրղզստանի նախագահ Սորոնբայ Ժենբեկովը, իսկ մինչ այդ այն ստորագրել էին Հայաստանի, Ռուսաստանի, Բելառուսի և Ղազախստանի նախագահները:
«Այս պահին մենք Մաքսային օրենսգրքի վավերացման վերաբերյալ ծանուցումներ ենք ստացել Հայաստանի, Բելառուսի, Ղազախստանի և Ռուսաստանի արտաքին գործերի նախարարությունից: Առաջիկայում մենք նման փաստաթուղթ ենք սպասում նաև Ղրղզստանից»,- ասել է ԵԱՏՀ մաքսային համագործակցության հարցերով նախարար Մուկայ Կադիրկուլովը:
ԵԱՏՄ անդամ երկրների ղեկավարների պայմանավորվածության համաձայն` միության Մաքսային օրենսգիրքը պետք է ուժի մեջ մտնի 2018թ. հունվարի 1-ից, որը կփոխարինի 2010թ. գործող Մաքսային միության Մաքսային օրենսգրքին:
