Samsung-ը ներկայացրել է Galaxy Note 8 նոր սմարթֆոնը
Samsung կորպորացիան օգոստոսի 23-ին ներկայացրել է իր Galaxy Note 8 նոր սմարթֆոնը: Նորույթի շնորհանդեսը տեղի է ունեցել Նյու Յորքում:
Սարքն ունի 6,3-դյույմանոց էկրան՝ շեղ կողերով: Սմարթֆոնը հանդերձված է Snapdragon ութմիջուկանոց պրոցեսորով և 6 ԳԲ գործառական հիշողությամբ: Ներսարված հիշողության նվազագույն ծավալը կկազմի 64 ԳԲ:
Սմարթֆոնի գլխավոր առանձնահատկություններից մեկը հիմնական խցիկն է՝ կրկնակի օբյեկտիվով՝ 12 մեգափիքսել լուծաչափով և օպտիկական կայունացմամբ: Ճակատային խցիկի լուծաչափը կազմում է 8 մեգափիքսել:
Galaxy Note 8-ի կորպուսը պատրաստված է մետաղից և ապակուց, պաշտպանված է ջրի ներթափանցումից և ունի բարձր հակահարվածային հատկություններ: Այն մատչելի է սև, դեղին և կապույտ գույներով:
ԱՄՆ-ում նորույթը վաճառքի կհանվի սեպտեմբերի 15-ին, հաղորդել է ՏԱՍՍ-ը:
