«Տոտենհեմը» գնեց «Այաքսի» պաշտպան Դավինսոն Սանչեսին 46 մլն եվրոյով
Տրանսֆերային խելագարությունը շարունակվում է: Կոլումբիայի երիտասարդական հավաքականի 21-ամյա պաշտպանը պայմանագիր ստորագրեց «Տոտենհեմի» հետ մինչև 2023 թվականը:
«Ես ցանկանում եմ շնորհակալություն հայտնել «Այաքսի» մարզիչին, ղեկավարությանը, ֆուտբոլիստներին և երկրպագուներին ամեն ինչի համար: Ես շատ ուրախ եմ պայմանագիր ստորագրել այնպիսի անվանի թիմի հետ, ինչպիսին «Տոտենհեմն» է: Անհամբերությամբ սպասում եմ Մաուրիսիո Պոչետինոյի հետ աշխատելու հնարավորությանը և թիմի բոլոր ֆուտբոլիստներին հանդիպելուն»,- Սանչեսին է մեջբերում «Տոտենհեմի» պաշտոնական կայքը:
Դավինսոն Սանչեսն «Այաքս» է տեղափոխվել 2016 թվականին կոլումբիական «Ատլետիկո Նացիոնալից»: Սանչեսը դարձավ 3-րդ ֆուտբոլիստը Ռաֆայել վան դեր Վարտից (2002) և Յան Վերտոնգենից (2012) հետո, ով դեբյուտային մրցաշրջանում ճանաչվեց Հոլանդիայի առաջնության լավագույն ֆուտբոլիստը:
Պատրաստեց Անի Գաբուզյանը
