«Սուրճը, գազավորված ըմպելիքները, ալկոհոլը ջրազրկում են առաջացնում». խորհուրդներ մասնագետից

«Սուրճը, գազավորված ըմպելիքները, ալկոհոլը ջրազրկում են առաջացնում». խորհուրդներ մասնագետից

Բժշկական գիտությունների դոկտոր, պրոֆեսոր, սննդագետ Հասմիկ Եղիազարյանի համոզմամբ՝ ամռանը եղանակն օրգանիզմի համար որոշակի առանձնահատկություններ է ստեղծում սննդակարգի վերաբերյալ:

Նրա խոսքով՝ ամռանը ցանկալի չէ ուտել շատ ճարպոտ մթերքներ, նախընտրելի է ուտել բանջարեղեն, մրգեր, ինչը բոլորովին չի նշանակում, որ մարդիկ պետք է դառնան բուսակեր. մարդու օրգանիզմը 75 %-ով բաղկացած է սպիտակուցներից, որը, մասնագետի պնդմամբ, հանդիսանում է օրգանիզմի համար շինանյութ:

Հասմիկ Եղիազարյանը խորհուրդ տվեց օգտագործել մսամթերք՝ թռչնամսի, ձկան տեսքով, խուսափել ճարպոտ, տապակած մթերքներից:

Սննդային թունավորումներից խուսափելու համար՝ սննդագետը նշեց, որ պետք է ճիշտ ընտրել մթերքը՝ ուշադրություն դարձնելով պիտակներին, պահպանման ժամկետներին, փաթեթավորման ամբողջականությանը: Կան մթերքներ, որոնք 10 աստիճանից բարձր ջերմաստիճանի պարագայում վնասվում են, հիմնականում՝ կաթնամթերքը, մսամթերքը:

Ըստ բանախոսի՝ նաև պետք է խուսափել աղցաններից, որոնք պատրաստված են մայոնեզով, քանի որ 3 ժամ հետո նման սննդամթերքը սեղանի վրա կորցնում է իր որակը:

«Սուրճը, գազավորված ըմպելիքները պարունակում են կոֆեին, իսկ դա օրգանիզմում առաջացնում է ջրազրկում: Նույնը վերաբերում է նաև ալկոհոլային խմիչքներին: Ալկոհոլը նույնպես ջրազրկում է առաջացնում, և արագացնում է սրտի աշխատանքը: Իսկ շոգ օրերին սիրտ-անոթային համակարգն արդեն իսկ գերծանրաբեռնված է աշխատում»,- ասաց Հասմիկ Եղիազարյանը:

Սննդագետը նաև նշեց, որ քաղաքից դուրս գնալիս պետք է ուշադիր լինել, որ մթերքը չմնա արևի ուղիղ ճառագայթների տակ, և պետք է վերցնել այնպիսի ուտելիքներ, որոնք շուտ չեն փչանում:

Նրա դիտարկմամբ՝ եղանակը նպաստում է նաև սննդային թունավորումների զարգացմանը: Թունավորումները հիմնականում լինում են տարբեր տեսակի սնկերից, մսամթերքից, աղցաններից, որոնք մշակում չեն անցել:

Հասմիկ Եղիազարյանի խոսքով՝ հարկավոր է երկար ժամանակ եփել մսամթերքը, որ մանրէները ոչնչանան:

Թունավորման ախտանշաններն են ընդհանուր թուլությունը, գլխացավը, լուծը, սրտխառնոցը, փսխումը:

Հասմիկ Եղիազարյանը նաև խորհուրդ տվեց աղցանների մեջ օգտագործել ձեթ, քանի որ այն պարունակում է վիտամին E:

Վերջինս նաև շեշտեց, որ մեծ ուշադրություն պետք է դարձնել հեղուկների օգտագործմանը, քանի որ ամռանն օրգանիզմն ավելի շատ հեղուկի պահանջ է զգում:

«Մենք օրական 1.7 լիտր հեղուկ ենք կորցնում շնչառության տեսքով, միզելու և քրտնարտադրության ձևով: Հետևաբար՝ երբ ջերմաստիճանը 25 աստիճանից ավելի է, ցանկալի է կես ժամը կամ մեկ ժամը մեկ խմել ջուր»,- հավելեց մասնագետը:

Անի Թորոսյան

Գովազդ
Լրահոս
Ամենաընթերցված
ՕրվաՇաբաթվաԱմսվա
2017-11-28
Ի՞նչ կտա Հայաստանի սովորական քաղաքացիներին ՀՀ-ԵՄ համաձայնագիրը
Հայաստանում Եվրոպական միության պատվիրակության ղեկավար, Արտակարգ և լիազոր դեսպան Պյոտր Սվիտալսկին երեկ լրագրողների հետ հանդիպման ընթացքում խոսեց Հայաստան-Եվրոպական միություն նոր համաձայնագրի մասին։