«Չեն ցանկանում պատասխանատվության կանչել իրական հանցագործներին». Զարուհի Փոստանջյանը՝ իր և դստեր նկատմամբ տեղի ունեցած բռնության իրավական գործընթացի մասին
«Ավագանու այդ անձինք, ովքեր իրենց վարքագծով դեմ էին կուսակցության ծրագրին և ավագանու ծրագրին և նաև չեն կատարել խմբակցության կանոնադրությամբ նախատեսված պարտականությունները, նրանք ուղղակի պետք է հեռանան և հեռանալու են, և իրենց տեղը կգան մեր հաջորդ ընկերները, ովքեր ստանձնելու են այդ պարտականությունները»,- այսօր լրագրողների հետ հանդիպման ժամանակ ասաց Երևանի ավագանու «Երկիր Ծիրանի» խմբակցության ղեկավար Զարուհի Փոստանջյանը:
Խոսելով ավագանու ընտրությունների օրն իր և դստեր նկատմամբ տեղի ունեցած բռնության իրավական գործընթացի մասին՝ Զ. Փոստանջյանն ասաց, որ այս պահի հարուցված է քրեական գործ, իրենք ճանաչվել են՝ որպես տուժողներ. «Իհարկե, միտումն այնպիսին է, որ չեն ցանկանում պատասխանատվության կանչել իրական հանցագործներին: Դեռ չկա որևէ մեկը, ով կգտնվի մեղադրյալի կարգավիճակում, մինչդեռ ամեն ինչ պարզ է, առաջին հերթին՝ մեղադրյալ պետք է ընդգրկվեն հենց Ոստիկանության աշխատակիցները, քանի որ այդ ամբողջ օպերացիան հովանավորում էր ՀՀ ոստիկանությունը»:
