Ինչպե՞ս է փոխվելու Հիպոթեքային վարկի սպասարկման համար եկամտային հարկի գումարների փոխհատուցման կարգը

2018 թվականի հունվարի 1-ից ուժի մեջ է մտնելու ՀՀ հարկային օրենսգիրքը, որով, ի թիվս այլ փոփոխությունների, ուժը կորցրած է ճանաչվելու «Եկամտային հարկի մասին» ՀՀ օրենքը և համապատասխանաբար եկամտային հարկի վերա­դարձի գործընթացը կարգա­վորող գործող կարգը:

ՀՀ ֆինանսների նախարար Վարդան Արամյանը կառավարության առաջիկա նիստում կներկայացնի «Հիպոթեքային վարկի սպասարկման համար վճարված տոկոսների գումարների չափով ֆիզիկական անձանց կողմից վճարված եկամտային հարկի գումարների փոխհատուցման կարգը սահմանելու մասին» ՀՀ կառավարության որոշման նախագիծը, որով առաջարկվում է սահ­մա­­նել ՀՀ հարկային օրենսգիրքը ուժի մեջ մտնելուց հետո հիպոթեքային վարկի սպա­սարկման համար վճարված տոկոսների գումարների չափով վճարված եկամտային հարկի գումարները պե­տա­կան բյուջեից փոխ­հա­տու­ցելու կարգը:

Ըստ այդմ՝ եկամտային հարկի գումարների փոխհատուցման նպատակով վարկառուն հարկային մարմին է ներկայացնելու անհրաժեշտ փաստաթղթերը, ապա հաջորդող հինգ աշխա­տան­քա­յին օրվա ընթացքում կազմվում է տվյալ հաշվետու եռամսյակի համար փոխ­հա­տուց­վող գումարի վերա­բեր­յալ հարկային մարմնի կողմից սահմանված ձևի եզրակացություն և ուղարկվում վերա­դաս հարկային մարմին: Որոշակի գործընթացից հետո փոխհատուցվող գումարը փոխանցվում է վարկառուի բանկային հաշվին:

Եկամտային հարկի գումար­­ների փոխհատուցման դրույթն ուժի մեջ է մտնելու 2019 թվականի հուլիսի 1-ից:

Հիշեցնենք, որ այս կարգը տարածվում է Հայաստանի տարածքում կառուց­ված կամ կառուցվող բազմաբնակարան բնակելի շենքում անմիջապես կառուցապատողից, ինչպես նաև պետության և (կամ) համայնքի կողմից իրականացվող բնակարանային ապա­հո­վության ծրագրի շրջանակներում պետությունից կամ համայնքից 2018 թվականի հուն­վարի 1-ից հետո բնակարան ձեռք բերող կամ Հայաստանի տարածքում անհա­տական բնակելի տուն կառուցող վարձու աշխատողների վրա։