Թիլերսոնը ՄԱԿ-ի ԱԽ-ի նիստում արծարծելու է ԿԺԴՀ-ի դեմ նոր միջոցների ձեռնարկման հարցը
ԱՄՆ-ի պետքարտուղար Ռեքս Թիլերսոնը պլանավորում է ՄԱԿ-ի Անվտանգության խորհրդի նիստում արծարծել ԿԺԴՀ-ի նկատմամբ «հետագա զգալի միջոցների» ձեռնարկման անհրաժեշտության հարցը այդ երկրի կողմից միջուկային զենքի եւ բալիստիկ հրթիռների մշակումը շարունակելու դեպքում:
Այս մասին ՏԱՍՍ-ին հայտարարել է Մացյալ Նահանգների վարչակազմի պաշտոնական ներկայացուցիչը՝ մեկնաբանելով Անվտանգության խորհրդի՝ ապրիլի 28-ին նշանակված նախարարական նիստը:
«Պետքարտուղաը կօգտագործի այդ հնարավորությունը, որպեսզի ամրապնդի մեր ընդհանուր պարտավորությունը, որը հետագա զգալի միջոցների ձեռնարկումն է ԿԺԴՀ-ի դեմ, եթե նա շարունակի խախտել իր միջազգային պարտավորությունները»,-ասել է գործակալության զրուցակիցը:
Անվտանգության խորհրդի նիստին սպասվում է ՄԱԿ-ի գլխավոր քարտուղար Անտոնիու Գուտերիշի, ինչպես նաեւ մի շարք երկրների, այդ թվում՝ Մեծ Բրիտանիայի, Ղազախստանի, Չինաստանի, Սենեգալի, Եթովպիայի, Հարավային Կորեայի եւ Ճապոնիայի արտաքին գործերի նախարարությունների ղեկավարների մասնակցությունը: Հանդիպմանը Ռուսաստանը կներկայացնի արտաքին գործերի փոխնախարար Գենադի Գատիլովը:
