Լեհաստանը կարգավարներին մեղադրել է Սմոլենսկի մերձակայքում ավիաաղետ հրահրելու մեջ
Լեհաստանի Գլխավոր դատախազությունը մեղադրանքներ Է առաջադրել ռուսաստանցի կարգավարների, ինչպես նաեւ այն «երրորդ անձի» հասցեին, որը գտնվել է թռիչքների կառավարման աշտարակում, Սմոլենսկի մերձակայքում դիտավորյալ ավիաաղետ հրահրելու մեջ: Այս մասին հայտնել է Polska Agencja Prasowa-ը՝ վկայակոչելով գլխավոր
դատախազի տեղակալ Մարեկ Պոշչենեկին:
Նրա խոսքով՝ Վարշավան մոտ ժամանակներս կդիմի Մոսկվային՝ ռուսաստանցի ավիակարգավարների հարցաքննության համար իրավական օգնության պահանջով:
Լեհաստանի ռազմաօդային ուժերի Տու-154 ինքնաթիռը Սմոլենսկի մերձակայքում ընկել է 2010 թվականի ապրիլի 10-ին: Վթարի հետեւանքով զոհվել են ինքնաթիռում գտնվող բոլոր 96 ուղեւորները, այդ թվում՝ նախագահ Լեխ Կաչինսկին՝ տիկնոջ հետ:
Միջպետական ավիացիոն կոմիտեն պատահարի պատճառը համարել է օդաչուների սխալը, մասնավորապես, պահեստային օդանավակայան չհեռանալու որոշումը: Լեհական կողմը կատարել է սեփական հետաքննություն եւ մեղքի մի մասը բարդել ռուսաստանցի կարգավարների վրա:
