«Ինչո՞ւ պետք է Ռուսաստանը հրաժարվի իր դաշնակից Հայաստանից»
Թուրքիան և Ռուսաստանը հարաբերություններում սահմանագիծը չեն անցնի: Այս մասին «Արմենպրես»-ի մամուլի սրահում հրավիրված ասուլիսում նշեց ՀՀ ԳԱԱ արևելագիտության ինստիտուտի տնօրեն, թուրքագետ Ռուբեն Սաֆրաստյանը:
«Թուրքիան Եվրոպայի հետ հարաբերությունների վատթարացման այս փուլը կփորձի փոխարինել Ռուսաստանի հետ հարաբերությունների սերտացմամբ: Թուրքիան կփորձի ցույց տալ, որ իր նշանակությունը բավական մեծ է: Մյուս կողմից այդ ստեղծված իրավիճակը կօգտագործի Ռուսաստանի հետ հարաբերություններում»,-ասաց Ռուբեն Սաֆրաստյանը:
Չնայած Թուրքիայի ու Ռուսաստանի հարաբերությունների սերտացմանը, միևնույն է երկու երկրներն ունեն աշխարհաքաղաքական բնույթի սահմանափակումներ: Առաջինը պայմանավորված է ՆԱՏՕ-ի գործոնով, Թուրքիան ՆԱՏՕ-ի անդամ է, իսկ ՆԱՏՕ-ն Ռուսաստանի նկատմամբ վարում է սուր քաղաքականություն: Դրանից բացի, Թուրքիան իր զենքը ստանում է Եվրոպայից, ԱՄՆ-ից, սա ևս կարևոր սահմանափակում է Անկարայի համար: Հաջորդն այն է, որ երկրների շահերը ռազմավարական առումով չեն համընկնում, որոշ դեպքերում նույնիսկ հակադրվում են միմյանց:
«Ինչ վերաբերում է Հայաստանի դերակատարությանը. Մերձավոր Արևելքում Ռուսաստանի դերը բարձրանում է, դա էլ իր հերթին բարձրացնում է Հայաստանի նշանակությունը: Ի վերջո, Ռուսաստանի ռազմաբազան մեր երկրում է: Մենք ունենք ՌԴ-ի տրամադրած այնպիսի զենք, որի գործողության չափերը մի քանի հարյուր կմ է: Այդ մասին գրում է նաև թուրքական մամուլը: Հայաստանը գործոն է և ինչո՞ւ պետք է Ռուսաստանը հրաժարվի իր դաշնակից Հայաստանից, մենք էլ պետք է շահագրգռված լինենք այդ հարցում, որովհետև աշխարհաքաղաքական իրադրությունն է դա պարտադրում»,-հավելեց թուրքագետը
