Բաժիններ՝

«Ոնց որ սրտով չեք հանում, ոնց որ ցանկանալով չեք հանում, պարո՛ն Եղիազարյան». վարչապետն ու փոխոստիկանապետն ընդհանուր հայտարարի չէին գալիս

Այսօր կառավարության նիստում Ճանապարհային ոստիկանության համակարգի բարեփոխումների հայեցակարգի քննարկման ժամանակ բավականին ուշագրավ երկխոսություն տեղի ունեցավ վարչապետ Կարեն Կարապետյանի և ոստիկանության պետի տեղակալ Վարդան Եղիազարյանի միջև: Վերջինս ներկայացրեց նախագիծը, որով զգալի բարեփոխումներ են իրականացվում ՃՈ ոլորտում:

«Բոլոր ջանքերը միտված են լինելու բնակչությանը մատուցվող ծառայությունների որակի բարձրացմանը, կոռուպցիոն ռիսկերի նվազեցմանը, ճանապարհային պատահարների թվի և հետևանքների նվազեցմանը, վարչական բեռի թեթևացմանը»,- ասաց Եղիազարյանը:

«Մեր քաղաքացիների համարն ի՞նչն է փոխվել»,- հարցրեց Կ.Կարապետյանը:

«Նախ թեթևացնում ենք վարչական բեռը, բավականին դյուրինացնում ենք էն բոլոր փողոցային երթևեկության կանոնները, որտեղ դա հնարավոր է իրականացնել, տրանսպորտային հոսքերն ենք ավելի հստակ վերահսկում»,- ասաց Եղիազարյանը` նշելով, որ տուգաքների վրա նախկինում 50 % տույժի ավելացում կար, այժմ դա նվազեցվում է 2 անգամ՝ 25 % է դառնում:

«Նվազեցնո՞ւմ ենք, թե՞ հանում ենք»,- հարցրեց Կարապետյանը:

«Նվազեցնում ենք»,- կրկնեց Եղիազարյանը:

«Էս մեր քաղաքացիներին էդ ա հետաքրքրում, որ դուք տուգանքների տույժերը հանում եք»,- փոխոստիկանապետին փորձեց ուղղել Կ.Կարապետյանը:

Սակայն Եղիազարյանը պնդեց, թե չեն հանում, այլ նվազեցնում են:

«Հիմա նվազեցնո՞ւմ եք, թե՞ հանում եք»,- իր հարցը կրկնեց Կարապետյանը:

Եղիազարյանը փնտրեց ձեռքի փաստաթղթերում և վերջապես համաձայնեց վարչապետի հետ. «Հա, հանում ենք, պարոն վարչապետ»:

«Ոնց որ սրտով չեք հանում, ոնց որ ցանկանալով չեք հանում, պարո՛ն Եղիազարյան, ոնց որ ընենց զոռովեք էս բանը բերել»,- նկատեց Կ.Կարապետյանը:

Բաժիններ՝

Տեսանյութեր

Լրահոս