Վրաստանի գլխավոր դատախազը հրաժարական է ներկայացրել. ԶԼՄ-ներ
Վրաստանի գլխավոր դատախազ Իրակլի Շոթաձեն լքել է իր պաշտոնը, հայտնում է Front News գործակալությունը՝ վկայակոչելով իր աղբյուրներին:
Ըստ գործակալության տեղեկությունների՝ Շոթաձեն հրաժարականի հայտարարություն է գրել: Հաղորդվում է, որ նրա հրաժարականը կհանրայնացվի փետրվարի 20-ից հետո, երբ Համայն Վրաց պատրիարք Իլյա Երկրորդը Բեռլինից վերադառնա Վրաստան:
Աղբյուրի տեղեկություններով՝ Վրաստանի գլխավոր դատախազի հրաժարականը կապված է Վրաստանի պատրիարքարանի ներկայացուցչի ձերբակալության հետ, ինչպես նաև կառավարության ղեկավարի դժգոհությամբ՝ կապված այդ պաշտոնում նրա աշխատանքի հետ:
Հաղորդվում է, որ Շոթաձեի հետ միասին այդ պաշտոնից կհեռանան նաև նրա տեղակալները:
Նշվում է, որ Շոթաձեի հրաժարականի մասին տեղեկատվությունը հաստատում են նաև վրացական այլ ԶԼՄ-ներ՝ վկայակոչելով իրենց աղբյուրներին:
Վրաստանի գլխավոր դատախազությունում չեն հաստատում Շոթաձեի հրաժարականի մասին տեղեկությունը:
