Քաղցկեղով հիվանդ երեխաներն առաջին տիկին Ռիտա Սարգսյանի հոգածության ներքո են
ՀՀ առաջին տիկին Ռիտա Սարգսյանի բարձր հովանու ներքո կազմակերպվեց բարեգործական համերգ, որի ամբողջ հասույթը կուղղվի քաղցկեղով հիվանդ երեխաների բուժմանը։ Տոմսերի գնորդները երեխաներն էին՝ դպրոցականները: «Երեխան պետք է մանկուց սովորի բարեգործություն անել և զգա, որ բարեգործությունը գերագույն հաճույք է»,- «Արմենպրես»-ի հաղորդմամբ` ընդգծեց առաջին տիկինը:
Ռ. Սարգսյանը նշեց, որ համերգի երգացանկում ընդգրկվել են հին ու բարի մանկական երգեր: «Մենք հիշեցինք ծնողների, տատիկների և պապիկների մանկական երգերը և անհրաժեշտություն եղավ թարգմանելու դրանք: Այդ ժամանակ մեզ օգնության հասավ Ավետ Բարսեղյանը: Նա թարգմանեց բոլոր տեքստերը, այնուհետև մեզ միացավ Նարեկ Դուրյանը իր հրաշալի սցենարով»,- ասաց առաջին տիկինը:
Հաղորդավար, երգերի խոսքերի հեղինակ Ավետ Բարսեղյանի խոսքով` Ռիտա Սարգսյանի մանկավարժական երկար տարիների փորձի շնորհիվ կարողացան կյանքի կոչել այս համերգը: «Երգերի հաջողության մեծ գրավականը տիկին Սարգսյանի մանրակրկիտ աշխատանքն է, քանզի նա մանուկների հետ երկար տարիներ աշխատել է և լավ գիտի, թե որ երգերը, հնչյունները և շարահյուսությունը կարող են հաճո լինել մանուկներին»,- շեշտեց Բարսեղյանը:
Քաղցկեղով հիվանդ երեխաների ծնողների միջազգային կոնֆեդերացիայի առաջարկով` 2002 թվականից փետրվարի 15-ին ամեն տարի նշվում է Երեխաների քաղցկեղի դեմ պայքարի միջազգային օրը: Առողջապահության համաշխարհային կազմակերպության (ԱՀԿ) վիճակագրական տվյալների համաձայն` աշխարհում տարեկան գրանցվում է չարորակ ուռուցքով հիվանդացության 215 000 նոր դեպք մինչև 14 տարեկան երեխաների շրջանում և 85 000` 15-ից 19 տարեկանների շրջանում: ԱՀԿ մասնագետների կարծիքով` ժամանակին ախտորոշում և բուժում ստանալու պարագայում չարորակ ուռուցքների 80%-ը բուժվում է: Մեր երկրում այդ թիվը տատանվում է 65%-70%-ի սահմաններում: Հայաստանում տարեկան գրանցվում է մանկական քաղցկեղի 50-ից 60 նոր դեպք:
Չարորակ ուռուցքներով երեխաների ախտորոշումը և բուժումը կատարվում է ՀՀ ԱՆ Վ.Ֆանարջյանի անվան Ուռուցքաբանության ազգային կենտրոնում, ՀՀ ԱՆ Ռ.Յոլյանի անվան արյունաբանական կենտրոնում և ԵՊԲՀ «Մուրացան» հիվանդանոցային համալիրի քիմիաթերապիայի կլինիկայում` պետական պատվերի շրջանակներում: Քաղցկեղով հիվանդ երեխաների բուժման գործընթացում անգնահատելի է «Նվիրիր կյանք» բարեգործական հիմնադրամի և հոգաբարձուների խորհրդի պատվավոր նախագահ Ռիտա Սարգսյանի մասնակցությունը: Հիմնադրամը մշտապես աջակցում է հիվանդ երեխաների բուժման հետ կապված խնդիրների լուծմանը, թանկարժեք դեղերի ձեռք բերմանը, անհրաժեշտության դեպքում` օժանդակում է նրանց բուժման կազմակերպմանը ինչպես արտերկրի հեմատոլոգիական և օնկոլոգիական կլինիկաներում, այնպես էլ Հայաստանում վերջերս արդիականացված ՀՀ ԱՆ Ռ.Յոլյանի անվան արյունաբանական կենտրոնում: Նոր ծառայություններով ու սարքավորումներով համալրված կենտրոնը հնարավորություն ունի բարձրացնելու և միջազգային ցուցանիշներին հասցնելու հիվանդ մանուկների, նաև մեծահասակների բուժման արդյունավետությունը:
Կենտրոնում արյան չարորակ հիվանդությունների ախտորոշ ումն իրականացվում է միջազգային չափանիշներին համապատասխան նորագույն մեթոդներով: Միաժամանակ, ՀՀ ԱՆ Ռ.Յոլյանի անվան արյունաբանական կենտրոնում հիմնվել է տարածաշրջանում եզակի ոսկրածուծի փոխպատվաստման բաժանմունք, որի շնորհիվ հիվանդներն այլևս ստիպված չեն լինի իրենց փրկությունը որոնել արտերկրում:
