Աստանայում մեկնարկում է միջսիրիական բանակցությունների երկրորդ փուլը
Աստանայում Սիրիայի կարգավորման հարցով հերթական հանդիպման ընթացքում, որը պլանավորված է փետրվարի 15-16-ին, միջազգային միջնորդները կփորձեն հերթական անգամ բանակցությունների սեղանի շուրջ նստեցնել Սիրիայի իշխանությունների և զինված ընդդիմության ներկայացուցիչներին։
Երկօրյա բանակցությունները պլանավորվում են այն նույն ձևաչափով, որով հրավիրվել էր նման առաջին հանդիպումը Ղազախստանի մայրաքաղաքում հունվարի 23-24-ը՝ ՌԴ-ի, Իրանի, Թուրքիայի ներկայացուցիչների մասնակցությամբ, ինչպես նաև հրավիրված են Հորդանանի և ԱՄՆ-ի ներկայացուցիչները։
Մինչև վերջին պահը հայտնի չէր, թե արդյոք բանակցություններին կմասնակցի Սիրիայի զինված ընդդիմությունը, սակայն երեքշաբթի երեկոյան «Սիրիայի ազատ բանակի» ներկայացուցիչները հայտարարեցին Աստանա թռչելու պատրաստակամության մասին։
