ԱՄՆ-ի Սենատը Ջեֆ Սեշնսին հաստատել է գլխավոր դատախազի պաշտոնում
ԱՄՆ-ի Սենատի անդամների մեծամասնությունը պաշտպանել է սենատոր Ջեֆ Սեշնսին երկրի գլխավոր դատախազի պաշտոնում հաստատելու առաջարկը: Ինչպես տեղեկացնում է «Ինտերֆաքս»-ը, նրա թեկնածության օգտին քվեարկել է Կոնգրեսի վերին պալատի 52 անդամ, դեմ են արտահայտվել 47-ը:
Թրամփը ԱՄՆ-ի արդարադատության նախարարի պաշտոնում Սեշնսի թեկնածությունն առաջադրել էր տակավին անցյալ տարվա նոյեմբերին՝ նախագահական ընտրություններից անմիջապես հետո:
Սեշնսը, որը մինչ այժմ հանրապետական սենատոր էր Ալաբամայի նահանգից, հայտնի է ներգաղթի նկատմամբ հսկողության հարցում իր կոշտ դիրքորոշմամբ:
Ավելի վաղ Սպիտակ տան կայքում զետեղված հաղորդագրության համաձայն, պետության ղեկավարը «պաշտոնապես հայտարարել է այն 24 մարդկանց անունները, որոնք իր հետ աշխատելու են իր կաբինետում»:
Նրանց թվում ներառվել են Կենտրոնական հետախուզական վարչության ղեկավար Մայքլ Փոմփեոն, որին արդեն հաստատել է Սենատը, եւ Դենիել Քոութսը, որը նախագահի կողմից առաջադրվել է ազգային հետախուզության տնօրենի պաշտոնում, բայց դեռեւս հաստատման ընթացակարգ չի անցել:
