«Կհիշեցնենք 2023թ.». Պեսկովը՝ Պուտինին «մարդասպան» անվանած Fox News-ի հաղորդավարի ներողության մասին

ՌԴ նախագահի մամուլի քարտուղար Դմիտրի Պեսկովը մեկնաբանել է ամերիկյան Fox News հեռուստաալիքի հայտնի լրագրող Բիլ Օ’Ռայլի խոսքերն այն մասին, թե ինքը Պուտինից ներողություն կխնդրի 2023թ. ոչ շուտ և հայտարարել, թե «մենք բարի ենք և համբերատար»։

Բիլ Օ’Ռայլին, որը ԱՄՆ նախագահ Դոնալդ Թրամփի հետ հարցազրույցի ժամանակ Ռուսաստանի նախագահին մեղադրել էր սպանությունների մեջ, հասկացրել է, որ եթե ինքը ներողություն խնդրի Ռուսաստանի նախագահից, ապա դա տեղի կունենա նվազագույնը 6 տարի անց։

«Ես աշխատում եմ այդ ներողության վրա, սակայն դա կարող է որոշ ժամանակ պահանջել։ Դա կարող եք ստուգել 2023թ.»,- հայտարարել է նա իր հեռուստաշոուի ժամանակ։
«Այդ ջենտլմենի հետ մենք ունենք լավ տոնի ու դաստիարակության կանոնների տարբեր ընկալումներ։ Դա առաջին, սակայն մենք շատ բարի ենք և շատ համբերատար։ Օրացույցում կնշենք 23-րդ տարին և նրան կանդրադառնանք այդ հարցի վերաբերյալ»,- ասել է Պեսկովը։
«Պուտինը մարդասպան է», – հենց այս բառերով էր ձևակերպել իր հարցը լրագրողը Թրամփի հետ հարցազրույցի ընթացքում։

– «Դուք հարգո՞ւմ եք Պուտինին»:

– «Ես նրան հարգում եմ»:
– «Իսկապե՞ս: Ինչո՞ւ»:

– «Ես բազմաթիվ մարդկանց եմ հարգում: Դա չի նշանակում, որ ես նրա հետ լավ հարաբերություններ կունենամ: Նա իր երկրի առաջնորդն է: Լավ է Ռուսաստանի հետ լավ հարաբերություններ հաստատել, քան վատ, և եթե Ռուսաստանն օգնի մեզ ԴԱԻՇ-ի դեմ պայքարում, լավ է: Կստացվի՞՝ գաղափար չունեմ»:

– «Բայց նա մարդասպան է: Պուտինը մարդասպան է»:
– «Շատ են, շատ մարդասպաններ կան: Իսկ ի՚նչ է, մեր երկիրն անմե՞ղ է»:

Լրագրողի խոսքերը բողոք էր առաջացրել ինչպես Մոսկվայում, այնպես էլ Վաշինգտոնում։
Վլադիմիր Պուտինը «մարդասպան» որակմանն անձամբ չի արձագանքել։