McDonald’s-ը հերքել է Հայաստանում ռեստորանային ցանց բացելու մասին լուրերը

McDonald’s-ը չի պլանավորում ռեստորանային ցանց բացել Հայաստանում։ Այս մասին «Նովոստի-Արմենիա» գործակալության հարցմանն ի պատասխան հայտարարել է Եվրոպայում McDonald’s ռեստորանների ցանցի մամուլի քարտուղար Սանջեյ Միստրին։

Ավելի վաղ ԶԼՄ-ներում տեղեկություն էր հայտնվել այն մասին, թե վրացի գործարար, «Կոկա-Կոլա Բոթլերս Ջորջիա» ընկերության ղեկավար Թեմուր Չկոնիան ստացել է Հայաստանում արագ սննդի McDonald’s ցանցի ռեստորաններ բացելու լիցենզիա և այդ նպատակով փետրվարի 7-ին McDonald’s Georgia-ի պատվիրակությունը, որը ամերիկյան McDonald’s ցանցի գործընկերն է, այց կկատարի Հայաստան, ինչի ընթացքում էլ կքննարկվեն իրավական հարցեր։

Գործակալության հարցմանն ի պատասխան՝ McDonald’s-ի եվրոպական գրասենյակից պատասխանել են. «McDonald’s-ում մենք դիտարկում ու վերլուծության ենք ենթարկում համապատասխան տնտեսական և բիզնես գործոնները՝ որոշելով նոր շուկայում կամ երկրում ռեստորան բացելու կամ չբացելու հարցը։

Ներկայումս մենք չենք պլանավորում Հայաստանում ռեստորանային ցանց բացել»։