«ԵՄ-ն խոստանում է որքան հնարավոր է արագ չեղարկել Ուկրաինայի և Վրաստանի վիզաները». Մոգերինի
Մինչ Բրյուսելում ԵՄ 28 անդամ երկրների ԱԳՆ ղեկավարների հանդիպումը ԵՄ դիվանագիտության ղեկավար Ֆեդերիկա Մոգերինին հայտարարել է, որ այսօր չի քննարկվի Վրաստանի և Ուկրաինայի համար վիզաների չեղարկման հարցը, սակայն հույս է հայտնել, որ վիզաները մոտ ժամանակներս կչեղարկվեն։
«Հուսով եմ՝ մենք որքան հնարավոր է արագ կավարտենք դրա վրա աշխատանքը ոչ միայն Վրաստանի, այլև Ուկրաինայի համար»,- նրա խոսքերը մեջբերել է RIA Novosti-ն։
Ինչ վերաբերում է Վրաստանին, ապա դրա նկատմամբ իր վերաբերմունքը հայտնել էր Հարևանության և ընդլայնման քաղաքականության հարցերով եվրահանձնակատար Յոհաննես Հանը։
Նրա խոսքով՝ վիզաների ամբողջական չեղարկում հնարավոր է 2 շաբաթվա ընթացքում։
