Իրանում դատարանը վճռել է կուրացնել զոհի վրա ծծմբաթթու լցրած կնոջը
Իրանում դատարանը վճռել է կուրացնել կնոջ մեկ աչքը, որն իր զոհի վրա ծծմբաթթու էր լցրել՝ նրան զրկելով տեսողությունից, հայտնում է Reuters-ը՝ վկայակոչելով իրանական ԶԼՄ-ներին։
1979թ. Իսլամական հեղափոխությունից հետո Իրանում ընդունվել է շարիաթի իրավունքը, որը որոշակի դեպքերի ժամանակ նախատեսում է «թալիոնի» սկզբունքի կիրառում, որի համաձայն՝ պատիժը իրականացվելու է հանցագործությամբ իրականացված վնասի նմանությամբ։
Հարձակումը տեղի էր ունեցել 2 տարի առաջ Մահշեհր քաղաքում։ Զոհի ու մեղադրյալի անունները չեն հրապարակվում։
«Դատարանը վճռել է կուրացնել կնոջ մեկ աչքը, վճարել փոխհատուցում ու դատապարտել 7 տարվա ազատազրկման»,- դատարանի վճիռը մեջբերել է իրանական Tasnim գործակալությունը։
Reuters-ը նշում է, որ նման դեպքերում վերջին խոսքը տուժածինն ու նրա ընտանիքինն են, որոնք կարող են խնդրել չեղարկել ֆիզիկական պատիժը։
