«Ժառանգություն»-ում տարակարծությունները շարունակվում են. ընտրություններին մասնակցելու ձևաչափի վերաբերյալ համաձայնություն դեռ չկա
«Ժառանգություն» կուսակցության վարչության նիստն ընդհատվել է, քանի որ վարչության անդամները տարակարծություններ են ունեցել Ազգային ժողովի առաջիկա ընտրություններին մասնակցելու ձևաչափի վերաբերյալ: Ինչպես հաղորդում է «Արմենպրես»-ը, նիստից հետո լրագրողների հետ զրույցում Ազգային ժողովի «Ժառանգություն» խմբակցության պատգամավոր Զարուհի Փոստանջյանը հայտնել է, որ նիստի ընթացքում քննարկվել է երկրում տիրող քաղաքական վիճակը և այն հարցը, թե ինչ կարող է առաջարկել կուսակցությունը:
Անդրադառնալով ընտրություններին դաշինքով մասնակցելու վերաբերյալ հարցին` Փոստանջյանն ընդգծեց, որ ինքն անձամբ պատրաստ չէ դաշինքով մասնակցել: Նա ընդգծեց, որ կուսակցությունում ունի կողմնակիցներ, իսկ թե ինչ որոշում կկայացվի, ցույց կտա ժամանակը: Պատգամավորը չբացառեց, որ համաձայնության չգալու դեպքում կուսակցությունը կարող է ընդհանրապես ընտրություններին չմասնակցել:
Կուսակցության փոխնախագահ Արմեն Մարտիրոսյանն էլ նշեց , որ ընտրություններին դաշինքով մասնակցելու նախապատվություն կա, բայց որոշումը վերջնական չէ: Նրա խոսքով` ցանկացած հնարավորություն մնում է՝ ինչպես դաշինքով մասնակցելը, այնպես էլ առանձին ցուցակով:
Դաշինքով մասնակցելու համար կա որոշակի նախապատվություն, բայց այն կարող է վերջնական դառնալ, եթե գործընկերների հետ գան որոշակի համախոհության:
Նա հավելեց, որ քննարկումները դեռ շարունակվում են և վերջնական որոշում ունենալու դեպքում այդ մասին տեղյակ կպահեն հանրությանը:
