«Համարում եք` իմ գործառո՞ւյթն է՝ որ զանգ տամ ջղայն տոնով ասեմ՝ շաքարի գնին ձեռք չտաք». Կարեն Կարապետյան
ՀՀ վարչապետ Կարեն Կարապետյանի այսօրվա ասուլիսի ժամանակ լրագրողներից մեկը հարցրեց՝ օլիգարխների հետ լեզու գտնո՞ւմ եք, օրինակ կարո՞ղ եք ասել՝ շաքարի գնին ձեռք չտաք կամ ալյուրի գինը մի թանկացրեք: Հարցը կապված էր շաքավարազի վերջին թանկացման հետ։
«Դա համարում եք, որ ի՞մ գործառույթն է՝ որ զանգ տամ ջղայն տոնով ասեմ՝ շաքարի գնին ձեռք չտաք: Օլիգարխների հետ ես ինձ շատ հանգիստ եմ զգում: Կարագի, ալյուրի գները թանկացել են, սակայն ոչ ահագին: Գնողունակությունը ձեր եղել է նորմալ, ոչ վատ, քան անցած տարի: Ձեր գնողունակությունը անգամ հարյուր դրամով չի ընկել»,- պատասխանեց Կարեն Կարապետյանը՝ նշելով, որ ադմինիստրատիվ մեթոդներով, գներ թելադրելով չի կարելի տնտեսություն կառավարել։
Արձագանքին, որ մանրածախ առևտրի կրճատումը վկայում է գնողունակության անկման մասին, վարչապետը պատասխանեց. «Առևտուրը կրճատվել է ընդհանուր տնտեսական վիճակից: Շաքարի գինը բարձրացե՞լ է, թե ոչ, չգիտեմ, մնացած ապրանքների գները, որ իջել են, ինչո՞ւ չեք ասում»:
Ասուլիսի ընթացքում հարց հնչեց նաև բանանի հետ կապված։ Հիշեցնենք, որ նախորդ տարի Պետական եկամուտների կոմիտեն հաղորդագրություն տարածեց այն մասին, որ տնտեսավարողներից մեկից ահազանգ է ստացել. անհայտ անձինք խոչընդոտել են բանանի ներկրողին։ Նշվում էր, որ կոմիտեի քայլերի արդյունքում տնտեսվարողը հաջողությամբ ներմուծել է ապրանքը և ներմուծել Հայաստան։ Սակայն այս հայտարարությանը ոչ գործողություն չհետևեց՝ այդ անձանց գտնելու և քրեական պատասխանատվության ենթարկելու հարցում։
Լրագրողները հետաքրքրվեցին՝ ինչ եղավ հետո, ինչու ոչ ոք չպատժվեց, ովքեր են հիմա բանան ներմուծում «Պատկերացնում եք՝ ամեն բանան ներկրողին ես իմանամ: Ինձ համար կարևոր հարց չէ, թե պատիժ կրե՞լ են, թե ոչ, կարևորը՝ էլ նման տենդենց չլինելն է: Ինձ միլիցա մի սարքեք»:
