«ԵՏՄ-ի Մաքսային օրենսգիրքը կենսունակ է, դրան այլընտրանք չկա». Պեսկով
ԵՏՄ-ի Մաքսային օրենսգիրքը կենսունակ է, դրան այլընտրանք չկա, այն վաղ թե ուշ ուժի մեջ կմտնի, հայտարարել է ՌԴ նախագահի մամուլի քարտուղար Դմիտրի Պեսկովը։ Այս մասին հայտնում է RIA Novosti-ն։
Հիշեցնենք, որ նախորդ Եվրասիական տնտեսական բարձրագույն խորհրդի նիստի ժամանակ Բելառուսն ու Ղրղըզստանը չէին համաձայնեցրել ԵՏՄ-ի Մաքսային օրենսգիրքը։
«Ղրղըզստանի հարցով որոշ մշակումների կարիք կա։ Իսկապես, ղրղըզական կողմից որոշ նկատառումներ կան։ Հիմնականում դա կապված է ֆիտոսանիտարական վերահսկողության ոլորտի հետ։ Դա բացարձակ նորմալ աշխատանքային իրավիճակ է։ Այս օրենսգրքին այլընտրանք չկա։ Վաղ, թե ուշ, անկասկած, այն ուժի մեջ կմտնի»,- ասել է Պեսկովը լրագրողներին՝ պատասխանելով երեկ Եվրասիական տնտեսական բարձրագույն խորհրդի նիստին ղրղըզական կողմից օրենսգրքի չստորագրման մասին հարցին։
Ինչպես բացատրել է Պեսկովը, Մաքսային օրենսգրքի վրա աշխատանքը կշարունակվի ԵՏՄ անդամ երկրների ղեկավարների մակարդակով։ Նա ընդգծել է, որ Բելառուսը նույնպես կմիանա օրենսգրքին, քանի որ ավելի վաղ համաձայնեցրել էր դրա դրույթները։
