ԴԱԻՇ-ը պլանավորում է ահաբեկչությունների շարք իրականացնել Եվրոպայում. Times
Ահաբեկչական ԴԱԻՇ խմբավորումը մտադրվել է ահաբեկչությունների շարք իրականացնել Եվրոպայի մի շարք երկրներում, հայտնում է The Times-ը՝ հղում կատարելով ամերիկացի գեներալ Ռուպերտ Ջոնսին, որը տվյալներ է ստացել Սիրիայի Մանբիջ քաղաքից զինյալների նահանջի ընթացքում։
Ինչպես հիշեցնում է պարբերականը, անցած շաբաթ հատուկ ծառայություններին հաջողվել է ահաբեկչություն կանխել Ֆրանսիայում։ Ավելի վաղ հաղորդվել էր, որ Ֆրանսիայում նոյեմբերի 20-ին ձերբակալվել են 5 ծայրահեղականներ, որոնց մոտ հայտնաբերվել էր զենք։
Ջոնսը վստահություն է հայտնել, որ զինյալների պլանների մասին ավելի շատ տվյալներ կստացվեն Իրաքի Մոսուլ քաղաքի ազատագրումից հետո։
«Առկա են մեծաթիվ տեղեկություններ, փաստաթղթեր, էլեկտրոնային նյութեր, որոնց վրա աշխատանք է կատարվում և որոնք ուղղակիորեն մատնանշում են ողջ աշխարհում հարձակումների նախապատրաստական աշխատանքը»,- ասել է ամերիկացի զինվորականը։
The Times-ը հիշեցնում է, որ Եվրոպայի պետություններում ձեռնարկվել են անվտանգության բարձր միջոցառումներ։
