«Սեյրան ջան, ախր դու՝ զինվորական մարդ, կուլտուրական մարդ, գեներալ մարդ, կռված մարդ…». Արամ Մանուկյանը՝ Սեյրան Սարոյանին
«Ըստ իս՝ սա պետական մենաշնորհ է, հասարակությունը կարող օգտակար լինել, բայց պետությունն իր միջոցներով պետք է այս խնդիրները լուծի»,- այսօր Ազգային ժողովում հերթական նիստի ժամանակ հայտարարեց ՀԱԿ խմբակցության պատգամավոր Արամ Մանուկյանը։
Հիշեցնենք, որ այսօր Ազգային ժողովում շարունակում է քննարկվել ՀՀ պաշտպանության ժամանակ զինծառայողների կյանքին կամ առողջությանը պատճառված վնասների հատուցման մասին, զինծառայողների և նրանց ընտանիքի անդամների սոցիալական ապահովության մասին ՀՀ օրենքում լրացումներ և փոփոխություններ կատարելու մասին, պետական կենսաթոշակների մասին ՀՀ օրենքում լրացումներ կատարելու մասին ՀՀ օրենքների նախագծերի փաթեթը։
Ա. Մանուկյանի խոսքով՝ Հայաստանից տարեկան դուրս է գալիս 1-1.5 միլիարդ ապօրինի կանխիկ փող.
«Հարգելի պատկան մարմիններ, այս թիվը պետք է ստուգվի, այս աղբյուրը բերեք բյուջե։ Պետությունը նման անարժանապատիվ նախագիծ չէր բերի, նա ինքը պետք է այս հարցը լուծի։ Ես երկրում գիտեմ 5 միլիարդատեր, այս դահլիճում կա 60 միլիոնատեր՝ այս աղքատ երկրի պայմաններում։ Այդ մարդկանց մեկը պե՞տք է ասի՝ վիճակներս վիճակ չէ, եկեք մի բան անենք, դուք վերցրեք ձեզ վրա։ Բոլորը գիտեն՝ 40 տոկոսը մեր երկրում ստվերային տնտեսություն է, որը կազմում է 1 միլիարդ դոլար»։
Դիմելով ՀՀԿ-ական պատգամավոր Սեյրան Սարոյանին՝ Ա. Մանուկյանն ասաց. «Սեյրան ջան, ախր դու՝ զինվորական մարդ, կուլտուրական մարդ, գեներալ մարդ, կռված մարդ, ես ու Լյովը կարող ա, ջհանդամ, չիմանանք՝ բանակում ինչ ա կատարվում, դու չգիտե՞ս՝ ովքեր են գողացողները, եթե գիտես, Աստված չպե՞տք է պատժի այդ գողացողներին»։
Տեսանյութը՝ 1in.am-ի:
