«Սկոլկովոյում» քննարկվում են ԵԱՏՄ անդամ երկրներում տեխնոլոգիական արտադրության ձեռքբերումները

Մոսկվայում՝ «Սկոլկովո» տեխնոպարկում, հոկտեմբերի 26-28-ն անցկացվում է «Եվրասիական շաբաթ» ցուցահանդեսային համաժողովը, որին ՀՀ տնտեսական զարգացման և ներդրումների նախարարության ու Հայաստանի զարգացման հիմնադրամի աջակցությամբ մեկ միասնական տաղավարով մասնակցում են հայկական 6 ընկերություններ: «Եվրասիական շաբաթը» կազմակերպել են ԵԱՏՄ անդամ երկրները և Եվրասիական տնտեսական հանձնաժողովը: Մասնակից երկրները ներկայացնում են նոր տեխնոլոգիական արտադրության ձեռքբերումները:

Միջոցառումներին մասնակցում են՝ ՀՀ տնտեսական զարգացման և ներդրումների նախարարի տեղակալ Էմիլ Տարասյանը, Հայաստանի զարգացման հիմնադրամի գործադիր տնօրեն Կարէն Մկրտիչեանը, ինչպես նաև նախարարության և հիմնադրամի պատասխանատու ներկայացուցիչներ։

Հոկտեմբերի 26-ին միջոցառման վայր են այցելել ԵՏՀ Կոլեգիայի նախագահ Տիգրան Սարգսյանը, ԵՏՀ ներքին շուկաների, ՏՀՏ Կոլեգիայի անդամ (նախարար) Կարինե Մինասյանը, ԵՏՀ արդյունաբերության և ագրոարդյունաբերության Կոլեգիայի անդամ (նախարար) Սերգեյ Սիդորսկին և ԵՏՀ առևտրի հարցերով Կոլեգիայի անդամ (նախարար) Վերոնիկա Նիկիշինան:

Գործնական ծրագրի շրջանակում ընթանում են կլոր սեղաններ, թեմատիկ քննարկումներ, ինտերակտիվ շնորհանդեսներ, որոնց մասնակիցները նոր արդյունավետ ուղիներ են փնտրում ԵԱՏՄ միասնական շուկաների հետագա ձևավորման և ԵԱՏՄ արդյունաբերական ընկերությունների միջև արտադրական կոոպերացիայի զարգացման հնարավորությունների համար: Հայաստանից միջոցառմանը մասնակցում են «Ար և Ար դիզայն քնսթրաքշն», «ԼայմՏեխ», «Ունիկում Ինժիներինգ», «ԵԻԱ Ինժինիրինգ», «Երևանի կապի միջոցների ԳՀԻ» ընկերությունները, ինչպես նաև Տեղեկատվական և հաղորդակցության տեխնոլոգիաների գործատուների միությունը։

Նույն օրը փոխնախարար Էմիլ Տարասյանը մասնակցել և ելույթով հանդես է եկել մոսկովյան «Բաց ինովացիաներ» խորագիրը կրող ինովացիոն զարգացման միջազգային համաժողովի շրջանակում կայացած «Եվրասիական տնտեսական միությունում արդյունաբերական քաղաքականության իրականացման արդյունավետ մեխանիզմներ» թեմայով «կլոր սեղանին»։