Աբխազիան ահաբեկչություն է որակել հեռուստառադիոընկերության տարածքում տղամարդու ինքնապայթեցման փաստը
Աբխազիայի Սուխում քաղաքի դատախազությունը «ահաբեկչություն» հոդվածով քրեական գործ է հարուցել Աբխազիայի պետական հեռուստառադիոընկերության տարածքում տեղի ունեցած պայթյունի առնչությամբ, հայտնում է apsnypress գործակալությունը։
Սուխումի դատախազ Ռուսլան Տիրկբան հայտնել է, որ քրեական գործ է հարուցվել Աբխազիայի ՔՕ երկու հոդվածի հատկանիշներով (ահաբեկչական ակտ և պայթուցիկ սարքերի կրում, անօրինական ձեռքբերում, պահպանություն և տեղափոխություն)․
«Կատարվում են աշխատանքներ՝ պարզելու զոհի ինքնությունը»,- հավելել է Տիրկբան։
Ավելի վաղ Աբխազիայի անվտանգության խորհրդի քարտուղար Մուհամմեդ Կիլբան հայտարարել էր, որ ռումբը, ամենայն հավանականությամբ պետք է գործի դրվեր մարդկանց զանգվածային կուտակման վայրում։
Այսօր առավոտյան անձը չպարզված տղամարդն իրեն պայթեցրել էր Աբխազիայի պետական հեռուստառադիոընկերության շենքի մուտքի մոտ։
Վերջինս տեղում մահացել էր։ Նախնական տեղեկություններով՝ այլ տուժածներ չկան։
