Վարդան Օսկանյանը կուսակիցներին և համակիրներին կոչ է անում «ցուցաբերել քաղաքացիական ակտիվություն՝ մասնակցելով բոլոր տիպի խաղաղ հավաքներին ու միջոցառումներին»
Պաշտոնական գրանցումից հետո կայացել է «Համախմբում» կուսակցության վարչության առաջին նիստը, որի օրակարգում եղել է մեկ հարց՝ «Սասնա ծռեր» խմբի շուրջ և երկրում ստեղծված իրավիճակը:
Կուսակցության մամուլի ծառայության հաղորդագրության համաձայն, «Համախմբում»-ը վերահաստատում է իր դիրքորոշումը՝ բացառել խնդրի լուծման ուժային տարբերակը; անհապաղ լուծել «Սասնա ծռերի» անդամների սննդի, բուժօգնության խնդիրները, ինչը էապես կլիցքաթափի լարվածությունը հասարակության մեջ; թույլ չտալ հասարակության և ոստիկանության միջև թշնամանքի զարգացման միտումները՝ ապահովելով խաղաղ ցույցերի և երթերի լիակատար անվտանգությունը, որպես բարի կամքի դրսևորում՝ կարճելով ոստիկանության հետ բախումների ընթացքում ցուցարարների դեմ հարուցված քրեական գործերը; ջանքեր գործադրել՝ նպատակ ունենալով գտնել հանրության համար ընդունելի և խաղաղ հանգուցալուծում։
Կուսակցությունն արձանագրում է, որ ստեղծված իրավիճակն արդյունք է իշխանությունների վարած քաղաքականության: «Ակնհայտ է, որ հանրային լայն պահանջ կա երկրում արմատական փոփոխություններ իրականացնելու համար», – ասված է հաղորդագրությունում:
«Համախմբում»-ը կոչ է անում կուսակիցներին և համակիրներին «ցուցաբերել քաղաքացիական ակտիվություն՝ մասնակցելով բոլոր տիպի խաղաղ հավաքներին ու միջոցառումներին»:
