«Երեք ամիս է՝ անձրև է գալիս. այնպիսի իրավիճակ է, որ հողը ներծծելու տեղ էլ չունի, որ եկած ջուրը վերցնի»
Ճշտվում է Արագածոտնի մարզի Ապարան քաղաքում հուլիսի 6-ին հեղեղումների հետևանքով հասցված վնասի չափը: Ինչպես «Արմենպրես»-ի հետ զրույցում նշեց Ապարանքի փոխքաղաքապետ Ժորա Երեմյանը, վնասի չափը ճշտելու համար ստեղծվել է համապատասխան հանձնաժողով, որը տեղում աշխատում է:
«Հուլիսի 6-ին ամբողջ օրը զբաղված էինք ջրի հունը փոխելով, այսօր նոր կարողանում ենք դեպքի վայրում լինել` գնահատելու, թե ինչ է տեղի ունեցել, ինչ վնաս է հասցվել: Սելավատարերն ամբողջությամբ լցվել էին, և դրանց տարողունակությունը այլևս չէր բավականացնում, հետևաբար՝ ջուրը հոսել է քաղաք ու լցվել բնակելի տները»,- ասաց Ժորա Երեմյանը:
Թեպետ հանձնաժողովը դեռ արձանագրում է վնասը, սակայն Ժորա Երեմյանը փոխանցեց, որ և’ բնակիչներն են տուժել, և’ ենթակառուցվածքներն են վնասվել: Մասնավորապես` բնակիչների տները, այգիները, հողամասերը, բերքը, գոմերում եղած անասունները: Դրանից բացի, որոշ տեղերում վնասվել են փողոցները:
«Ահավոր հորդառատ անձրև էր: Այս տարի աննախադեպ անձրևներ են, գրեթե ամեն օր անձրև է գալիս, նման բան չէր եղել: Երեք ամիս է՝ անձրև է գալիս: Այնպիսի իրավիճակ է, որ հողը ներծծելու տեղ էլ չունի, որ եկած ջուրը վերցնի, թեկուզ 10 րոպե էլ անձրև է գալիս, եկած անձրևը հողի մակերեսով հոսում է: Իմ կարծիքով, նորմայից ավելի անձրև է եկել»,- ասաց փոխքաղաքապետը:
Նշենք, որ Ապարանում հեղեղումներից հասցված վնասի չափը պարզ կլինի առաջիկա օրերին:
