«Մարտիրոսներ» օպերայի հաղթարշավը շարունակվում է

Դեռևս 2014թ. նոյեմբերին հայաստանյան մամուլը տեղեկացրել էր Լոնդոնի հեղինակավոր Royal Festivall Hall համերգասրահում «Օպերա Ռարան»-ի կողմից բեմադրված՝ Դոնիցետտիի «Մարտիրոսներ» օպերայի համերգային կատարման մասին, որն իրականություն էր դարձել լոնդոնաբնակ հայտնի հայ բարերարներ Արմեն Սարգսյանի, Վաչէ Մանուկյանի և Հայկ Դիդիզյանի շնորհիվ։ Ընթերցողներին հիշեցնենք, որ իտալացի մեծ կոմպոզիտոր Գաետանո Դոնիցետտիի «Մարտիրոսները» օպերայի գործողություններն ընթանում են պատմական Հայաստանում՝ վաղ քրիստոնեական շրջանում: Իտալական դասական օպերայի այս հիանալի նմուշի կրճատված տարբերակը՝ «Պողիկտոս» անվամբ, Օպերայի եւ բալետի ազգային թատրոնում բեմադրել էր Տիգրան Լևոնյանը, 2001-ին՝ Քրիստոնեությունը Հայաստանում պետական կրոն հռչակման 1700-ամյակի տոնակատարությունների շրջանակում:

Լոնդոնյան տրիումֆից հետո «Օպերա Ռարան» իր «Մարտիրոսներով» շրջագայեց մի շարք հայտնի օպերային դահլիճներով, իսկ 2015-ին իրականացվեց նաև օպերայի ձայնագրությունը:

Եվ ահա հերթական հաճելի անակնկալը. մայիսի 15-ին Լոնդոնում կայացած Միջազգային օպերային մրցանակաբաշխությանը (International Opera Awards) «Մարտիրոսների» 3 լազերային սկավառակից կազմված ալբոմը շահեց տարվա լավագույն օպերայի ձայնագրությունը մրցանակը:

Այս մեծ ու կարևոր աշխատանքը իրականություն դարձավ «Օպերա Ռարայի» գեղարվեստական ղեկավար, հայտնի դիրիժոր Սըր Մարկ Էլդերի ջանքերի շնորհիվ ու աշխարհի լավագույն նվագախմբերից մեկի՝ Orchestra of the Age of Enlightenment-ի, ամերիկացի տենոր Մայքլ Սփայերսը (Պողիկտոս), կանադացի սոպրանո Ջոյս Էլ-Խուրին (Պաուլինա) և այլ հայտնի երգիչների համագործակցությամբ:

Նշենք, ի դեպ, որ հեղինակավոր այս մրջանակաբաշխությանն էր, որ մեր հայտի տենոր Գեղամ Գրիգորյանի դուստր՝ Հասմիկ Գրիգորյանը ստացավ տարվա լավագույն երիտասարդ երգչուհի մրցանակը:

ՄԱՐԻՆԵ ԶԱՔԱՐՅԱՆ