Սինգապուրը հետաքրքրված է ԵՏՄ-ի հետ ազատ առևտրի գոտու ստեղծմամբ. Տիգրան Սարգսյան
Սինգապուրը հետաքրքրված է Եվրասիական տնտեսական միության (ԵՏՄ) հետ ազատ առևտրի գոտու ստեղծմամբ: Այս մասին այսօր Պետերբուրգում անցկացվող միջազգային տնտեսական ֆորումում հայտարարել է Եվրասիական տնտեսական հանձնաժողովի կոլեգիայի նախագահ Տիգրան Սարգսյանը:
«Մենք երկխոսություն ենք սկսել, բանակցությունների ժամանակ Սինգապուրի վարչապետն առաջարկել է, որ շատ արագ անցում կատարենք Սինգապուրի հետ ազատ առևտրի գոտու մասին պայմանագրի կնքման հնարավորությունը քննարկելուն: Սինգապուրն ունի այդ հետաքրքրությունը: Ես ուրախ եմ ձեզ տեղեկացնել, որ ԵՏՄ երկրների վարչապետները քննարկել են այդ հարցը և նույնպես դրական են արտահայտվել»,- ասել է Տիգրան Սարգսյանը:
Մայիսին ՌԴ նախագահ Վլադիմիր Պուտինը Սինգապուրի վարչապետ Լի Սյան Լունի հետ հանդիպման ժամանակ հայտարարել էր, որ ԵՏՄ-ի և Սինգապուրի միջև ազատ առևտրի գոտու ստեղծումը կնպաստի երկկողմ առևտրաշրջանառության աճին:
