Արդյո՞ք հեռուստատեսության ոլորտը ազատ շուկա է
Հայաստանում հեռուստատեսության ոլորտը օլիգոպոլիստական մենաշնորհ է: Նման կարծիք այսօր ԱԺ նիստում Հեռուստատեսության և ռադիոյի ազգային հանձնաժողովի 2015 թ. գործունեության մասին հաղորդման ժամանակ հայտնեց ԲՀԿ-ական պատգամավոր Միքայել Մելքումյանը:
«Կա՞ն ճնշումներ, թե՞ ազատ շուկա է»,- հետաքրքրվեց նա:
ՀՌԱՀ փոխնախագահ Ժիրայր Դադասյանը պատասխանեց, որ հեռուստատեսային լիցենզիաների համար մրցույթ հայտարարվել է 2010թ. 10 տարի ժամկետով, հաջորդը կլինի 2020թ. «Այնպես չէ, որ ամեն տարի հնարավոր է լիցենզիա ստանալ և կարելի է ճնշում գործադրել»:
Ըստ նրա` հեռուստաընկերությունները փորձում են գործել ազատ, սակայն ՀԸ-ներն անմիջականորեն կապված են տնտեսության հետ և, բնականաբար, տնտեսություոնւմ որոշակի փոփոխությունները ազդում են հեռուստաընկերությունների վրա, գովազդը նոսրանում է:
«Այսինքն` մի անգամ ճնշում են ու 10 տարի էլ չեն ճնշում»,- եզրակացրեց Մ.Մելքումյանը:
Ժ.Դադասյանը չհամաձայնեց և հայտարարեց, որ ճնշումներ չկան, նաև մուլտիպլեքսի համար մրցույթը հայտարարվել է, ընկերությունները կարող են դիմել:
